Хитойдан Ўзбекистонга импорт қилинаётган мандарин ва ананас меваларини олиб киришда ўсимликлар карантини объектлари мунтазам равишда аниқланаётганлиги сабабли мазкур мевалар импортига вақтинчалик тақиқ ўрнатилди.

Ўсимликлар карантини ва ҳимояси агентлиги берган маълумотга кўра, Хитойдан импорт бўлган мандарин ва ананас партияларидан тегишли тартибда олинган намуналар Марказий фитосанитария лабораториясида эскпертизадан ўтказилган. Таҳлил натижаларига кўра, намуналарда «Ситрус оқ-қаноти» (Dialeurodes citri Ashmead), «Шарқ ситрус қалқондори» (Unaspis yanonensis Kuwana), «Ананас унсимон қурти» (Dysmicoccus brevipes Cockerell) каби карантин ости зараркунандалари аниқланган.

«Мазкур турдаги зарарли организмлар 20 га яқин юкда топилгани маълум бўлди.

Зарарланган маҳсулотлар тўғрисида Хитой давлатининг ўсимликлар карантини ва ҳимояси бўйича миллий ташкилоти огоҳлантирилиб, маълумотлар ва тегишли ҳужжатлар тақдим этилди.

Тақиқ ўрнатилган даврда Хитой давлатидан олиб келиниши режалаштирилаётган мандарин ва ананас меваларига карантин рухсатномасини расмийлаштириш вақтинча тўхтатилди», – дейилади Агентлик ахборотида.

Қайд этилишича, мазкур чора вақтинча бўлиб, потенциал хавф туғдирувчи ўсимликлар карантини объектларини Ўзбекистон ҳудудига кириб келиши ва тарқалишини олдини олиш мақсадида ўрнатилган.