АҚШ президенти Дональд Трамп Буюк Британиянинг Пекин билан иқтисодий ҳамкорликни кучайтириши «хавфли» эканини билдирди. Бу баёнот Буюк Британия бош вазири Кир Стармернинг Хитойга ташрифи чоғида янгради.

Ғарб етакчилари Трампнинг бож таҳдидлари ва Гренландия назоратини қўлга олишга уринишга қаратилган сиёсий қадамларидан хавотирга тушаётган бир пайтда, Стармер Хитойга борган навбатдаги етакчига айланди.

Яқин орада Германия канцлери Фридрих Мерц ҳам Хитойга ташриф буюриши кутилмоқда. Ундан олдин декабрь ойида Франция президенти Эммануэль Макрон Пекинда бўлиб, Си Цзиньпин билан бирга камёб сафарлардан бирини амалга оширган эди.

Пайшанба куни Хитой раиси Си Цзиньпин билан қарийб уч соат давом этган музокараларда Кир Стармер бозорларга кириш имкониятларини яхшилаш, божларни камайтириш ва инвестиция келишувларини муҳокама қилган.

У визасиз сафар бўйича келишувлар ва виски учун божларни пасайтиришни «жуда муҳим, рамзий аҳамиятга эга қадамлар» деб атади.

«Ишонч ва ўзаро ҳурмат айнан шу йўл билан қурилади», – деди Стармер.

Бироқ Вашингтонда, Британия ва Хитой яқинлашуви ҳақидаги саволларга жавобан Дональд Трамп «бу улар учун жуда хавфли» эканини айтган, аммо қўшимча изоҳ бермаган.

Апрель ойида Хитойга сафар қилишни режалаштираётган Трамп ўтган ҳафта Канада бош вазири Марк Карни Пекин билан иқтисодий келишувлар имзолагандан сўнг, Канадага қарши бож жорий этиш билан таҳдид қилган эди. 

Трамп баёнотидан олдин АҚШ савдо вазири Ҳовард Латник Стармернинг Хитой билан яқинлашуви самара бериш эҳтимоли пастлигини айтган. У, жумладан, Хитой экспортда жуда кучли экани ва у ерга маҳсулот сотиш жуда қийинлигини айтган.

Латникдан Трамп Британияга ҳам бож билан таҳдид қиладими, деб сўралганда, у «агар Британия бош вазири АҚШга қарши кескин позиция тутмаса, бундай бўлмайди», дея жавоб берган.

Британия бош вазири девони ва Хитой ТИВи Трамп баёнотига муносабат билдирмади.

Журналистлар билан суҳбатда Стармер Британия АҚШ билан яқин алоқаларни сақлаган ҳолда Хитой билан ҳам иқтисодий ҳамкорликни ривожлантира олишини айтди.

«АҚШ билан муносабатларимиз энг яқин алоқалардан бири — мудофаа, хавфсизлик, разведка ва савдо соҳаларида», – деди у.

Унинг таъкидлашича, Британия АҚШ ёки Хитой ўртасида танлов қилишга мажбур эмас.

Шунингдек, Британия ҳукумати манбаси айтишича, Вашингтон Хитойга ташрифдан олдин Британиянинг мақсадлари ҳақида олдиндан хабардор қилинган.

Сўнгги ҳафталарда Трампни очиқ танқид қилмасликка ҳаракат қилиб келган Стармер айрим масалаларда унга қарши чиқишга ҳам тайёр эканини кўрсатмоқда. У НАТО ҳақидаги «қабул қилиб бўлмас» баёнотлар учун Трампни узр сўрашга чақирган ва Гренландияни аннексия қилиш талабларига бўйсунмаслигини билдирганди.