АҚШ томонидан Эрон нефтига нисбатан санкцияларни вақтинча юмшатилиши ортидан Осиёдаги бир қатор давлатлар, хусусан Ҳиндистон, Эрон нефтини қайтадан сотиб олиш имкониятини кўриб чиқмоқда.

Маълумотларга кўра, Вашингтон нефть бозорида юзага келган танқисликни юмшатиш мақсадида 30 кунлик санкция истисносини жорий этган.

Маълум қилинишича, бу қарор фақат ҳозирда денгизда ушланиб қолган Эрон нефтини 19 апрелгача сотиб олишга амал қилади. Яъни, бу қарор янги экспортни эмас, балки мавжуд нефть захираларини бозорга чиқаришни назарда тутади.

Ҳиндистон нефтни қайта ишлаш заводлари Эрон нефтини харид қилишга тайёргарлик кўрмоқда. Улар ҳукумат кўрсатмалари ва тўлов механизмлари бўйича аниқлик кутмоқда ва бошқа Осиё давлатлари ҳам харид имкониятларини ўрганмоқда.

Осиё мамлакатлари нефтьнинг катта қисмини Яқин Шарқдан олади, шу сабабли Ҳўрмуз бўғози атрофидаги вазият уларга жиддий таъсир кўрсатмоқда.

Мутахассисларга кўра, тахминан 130–170 млн баррел Эрон нефти ҳозирда денгизда сақланмоқда ва бу ҳозирги ишлаб чиқариш йўқотишларини қисман қоплашга ёрдам беради.