Бировнинг аккаунтини эгаллаб, 2 минг доллар талаб қилган шахс ушланди
Бухоро вилоят ИИБ ахборот хизматининг «Xabar.uz»га маълум қилишича, интернет тармоғидаги аккаунтни ноқонуний эгаллаб, уни қайтариш эвазига пул талаб қилган шахс ҳуқуқни муҳофаза қилувчи органлар томонидан аниқланди.
Маълум бўлишича, тадбиркорлик фаолиятида фойдаланиб келинган электрон аккаунт номаълум шахс томонидан ўзлаштириб олинган. Кейинчалик аккаунтни қайтариш учун жабрланувчидан 2000 АҚШ доллари талаб қилган. Тўлов криптоактивлар орқали амалга оширилиши шарт қилиб қўйилган.
Олиб борилган тезкор-техник тадбирлар натижасида ушбу жиноятга алоқадор шахс фуқаро Ш.Б экани аниқланиб, ушланган.
Ҳозирда ҳолат юзасидан жиноят иши қўзғатилган бўлиб, тергов ҳаракатлари давом эттирилмоқда.
Мутахассислар фуқароларни электрон аккаунтлар хавфсизлигига эътиборли бўлишга чақириб, бундай ҳолатларга дуч келганда дарҳол ҳуқуқни муҳофаза қилувчи органларга мурожаат қилишни тавсия этмоқда.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter