АҚШ маъмурияти Россия ва Украина ўртасидаги урушни 4 июлга – АҚШ Мустақиллик кунига қадар якунлашга интилаётгани айтилмоқда. Бу ҳақда Bloomberg агентлиги Европа ва НАТОдаги манбаларга таяниб хабар берди.

Нашр суҳбатдошларининг таъкидлашича, Вашингтон томонидан тинчлик келишувини тезроқ имзолаш бўйича босим мавжуд. Бироқ айни пайтда Россия президенти Владимир Путин келишувга тайёр эканини кўрсатувчи аниқ белгилар йўқ.

Шу билан бирга, Украина президенти Владимир Зеленский CNN телеканалига берган интервьюсида АҚШнинг позицияси ҳақида гапириб, Дональд Трамп Киев Россия билан тинчлик битимини имзолашини, шу билан бирга Украинага хавфсизлик кафолатлари берувчи АҚШ ва Европа давлатлари билан келишув ҳам тузилишини исташини билдирган.

Зеленскийнинг сўзларига кўра, бу икки ҳужжат бир вақтнинг ўзида имзоланиши керак ва имкон қадар катта расмий маросим доирасида ўтказилиши мақсадга мувофиқ деб ҳисобланмоқда.

Ҳозирча музокараларнинг аниқ натижалари ёки келишувнинг мазмуни очиқланмаган. Европа манбалари эса Россия томонидан муросага тайёрлик белгилари кўринмаётганини қайд этмоқда.