Теҳрон Ҳўрмуз бўғози орқали ўтишни истаган айрим давлатлар билан музокаралар олиб бормоқда.

Бу ҳақда Эрон ташқи ишлар вазири Аббос Ароқчи маълум қилди. Бироқ у қайси давлатлар эканини очиқламаган.

Шу билан бирга, Ароқчи якуний қарор ҳарбийлар қўлида эканини таъкидлаган. Кейинчалик Эрон ТИВ вакили Исмоил Бағоний айрим давлатлар кемаларига махсус рухсат берилиб, улар бўғоздан ўтказилганини тасдиқлади.

Мутахассислар фикрича, Эрон тўлиқ очишга эмас, балки танлаб рухсат бериш сиёсатини юритмоқда. Бу орқали эса сиёсий босимни сақлаб қолиш ва нефть бозорида кескин беқарорликка йўл қўймаслик мақсад қилинган.

АҚШ президенти Дональд Трамп Европа иттифоқчиларига мурожаат қилиб, уларни Ҳўрмуз бўғозини очиш учун ҳаракатларга қўшилишга чақирди. У ҳатто, агар ёрдам бўлмаса, НАТОни «жуда ёмон келажак» кутаётганини айтганди.

Бироқ Европа давлатлари, жумладан, Буюк Британия, Германия, Франция ва бошқа НАТО давлатлари ҳам Яқин Шарқдаги ҳарбий иштирокини кенгайтирмаслигини айтди.

Таҳлилчилар фикрича, АҚШ истаса, куч ишлатиб бўғозни очиши мумкин. Аммо бу жуда катта хавф билан боғлиқ.

Бундан ташқари, бўғозни тўлиқ очиш учун эҳтимол қуруқлик амалиёти ҳам талаб қилиниши мумкин. Бу эса узоқ давом этадиган ва катта йўқотишларга олиб келадиган урушга айланиши эҳтимолини оширади.