«Википедия» (Wikipedia)га муқобил онлайн-энциклопедия xAI компанияси томонидан яратилади. Бу ҳақда компания асосчиси Илон Маск X (Twitter) ижтимоий тармоғида маълум қилди.

Янги ресурс «Грокипедия» (Grokipedia) деб номланади, унда «Википедия»да иқтибос келтириш тақиқланган манбаларни ҳам ўз ичига олган контент яратилади ва очиқ фойдаланиш мумкин бўлади, деб ёзди Маск.

Собиқ сармоячи банкир Жон Лефевр таъкидлашича, Wikipediaда Fox News, Breitbart, Daily Caller, Epoch Times, New York Post ва Federalist каби нашрлар тақиқланган манбалар рўйхатига киритилган. Америкалик инвестор Девид Сакс эса барча тақиқланган манбаларни ҳисобга олган ҳолда «Википедияни қайта ёзувчи» сунъий интеллект ечими учун аниқ бозор имконияти мавжудлигини айтган.

Юқоридаги каби фикр-мулоҳазаларга жавоб сифатида, Илон Маск шундай энциклопедия яратиш xAI режасида борлигини маълум қилди. Унинг айтишича, лойиҳа «инсониятнинг жами билимлари ҳаққи-ҳурмати учун» амалга оширилади ва унинг натижаларидан барча баҳраманд бўлади.