Испанияда уч кунлик поезд машинистларининг иш ташлаши бошланди, натижада биринчи куннинг ўзида 330 дан ортиқ юқори тезликдаги, йўловчи ва шаҳар атрофи поездлари қатнови бекор қилинди.

Иш ташловчилар темир йўллардаги хавфсизликнинг ёмонлигига норозилик билдирмоқдалар. Bloomberg хабар беришича, иш ташлаш январь ойида Кордова ва Каталониядаги поездларнинг рельсдан чиқиб кетиши натижасида юзага келган. 

Иш ташлаш миллий темир йўл компанияси Ренфе ва бошқа темир йўл ва инфратузилма операторлари ишчиларини ҳимоя қилувчи Семаф касаба уюшмаси томонидан ташкил этилган.

Касаба уюшмаси веб-сайтидаги баёнотга кўра, уюшма темир йўл инфратузилмаси хавфсизлиги учун масъул бўлганларни жиноий жавобгарликка тортишни, шунингдек, темир йўл хавфсизлигини кучайтиришни ва йўл ҳаракати хавфсизлигини мониторинг қилиш тизимини қайта кўриб чиқишни талаб қилмоқда. Испания транспорт вазирлиги билан музокаралар январь ойининг охиридан бери давом этмоқда, аммо келишувга эришилмаган. 

Испаниядаги поездлар кунига тахминан 1,4 миллион йўловчини ташийди, тахминан 5000 та қатновни амалга оширади. Юқори тезликдаги темир йўл линияларининг узунлиги 3000 км дан ошади. 

18 январь куни Испаниянинг Кордова провинциясида рельсдан чиқиб кетиш ҳодисаси юз берди. Малагадан Мадридга кетаётган поезд Мадриддан Уэлвага кетаётган бошқа йўловчи поезди билан тўқнашди. Камида 46 киши ҳалок бўлди ва ўнлаб одамлар жароҳат олди. 20 январ куни Каталонияда йўловчи поезди рельслар устидан қулаб тушган таянч деворга урилиб, рельсдан чиқиб кетди. Машинист ҳалок бўлди ва 37 киши жароҳат олди.