28 августга ўтар кечаси Россия қўшинлари Киевни ракета ва дронлар билан ўққа тутди. Ҳаво зарбалaридан бири Дарница туманидаги беш қаватли турар-жой биносига тегиб, унинг деярли бутун қисми вайрон бўлди.

Охирги маълумотларга кўра, ҳужум натижасида 15 киши ҳалок бўлган, улар орасида болалар ҳам бор. Тахминан 50 дан ортиқ одам яраланган.

Украина президенти Владимир Зеленский ушбу ҳодиса юзасидан Хитой ва Венгриядан реакция билдиришни сўраб, «болаларнинг ўлими барча нарсадан кучлироқ ҳиссиёт уйғотиши керак»лигини айтди.

Зеленскийнинг Хитой ва Венгрияга алоҳида мурожаат қилиши сабабсиз эмас.

Хитой Украина можаросида ўзини бетараф кўрсатса-да, Россия билан яқин иқтисодий ва сиёсий муносабатларга эга. Зеленский эса Пекиндан ҳеч бўлмаса инсонпарварлик нуқтаи назаридан қатъий баёнот кутаётганини билдирди. Унинг фикрича, болаларнинг ўлими – бу сиёсий манфаатлардан устун турадиган умуминсоний фожеа.

Венгрия ҳам Европа Иттифоқида Украина масаласида аксар вақт Москвага яқин позицияни эгаллайди. Венгрия раҳбарияти санкциялар ёки Украинага ёрдам масаласида кўп марта тўсиқ бўлган. Зеленский эса Будапештни «энг камида инсонпарварлик асосида» жавоб беришга чақирмоқда.

Яъни, у болаларнинг ҳалокати орқали Хитой ва Венгрияни бетарафликдан чиқишга, Россия тажовузига нисбатан аниқ ва қатъий муносабат билдиришга мажбур қилишни кўзламоқда.

Киев шаҳар маъмурияти 29 августни мотам куни деб эълон қилди.