Шимолий Корея етакчиси Ким Чен Ин Жанубий Корея президенти Ли Чже Мённинг узр сўраганига муносабат билдирди.

КХДР лидери мамлакат чегарасини кесиб ўтган дронлар билан боғлиқ  узрни қабул қилди, деб хабар беради Корея Меҳнат партияси Марказий қўмитаси бўлим директори ўринбосари Ким Ё Чжон. 

«Ҳукуматимиз Президент Ли Чже Мённинг кечирим сўрагани ва бундай ҳолатларнинг такрорланишининг олдини олиш учун кўрилган чораларни жуда тўғри ва доно деб билади. Давлатимиз раҳбари бу ҳалол ва саҳоватли инсоннинг хатти-ҳаракатларини қадрлайди»,—дейилади баёнотда (Корея телеграф агентлиги иқтибос келтирган). 

Бир кун аввал Жанубий Корея президенти Шимолий Корея ҳудудига хусусий дронларнинг учирилиши сабаб кечирим сўраган, уларни «провокацион ҳаракатлар» деб атаган эди. 

Ўтган ҳафта Жанубий Корея прокурорлари 2025 йил сентябридан 2026 йил январигача Шимолий Корея билан чегара орқали дронларни учирганликда айбланган уч кишига айблов эълон қилди. Судланувчилар 30 ёшли аспирант, Миллий разведка хизмати ходими ва ҳарбий офицердир.