Россия президенти Владимир Путин 30 декабр куни AҚШ раҳбари Жо Байден билан телефон орқали мулоқоти ўтказди. РФ етакчиси суҳбат чоғида AҚШ лидерини алоқалар бутунлай узилиши эҳтимолидан жиддий огоҳлантирган.

Бу ҳақда Кремл матбуот хизмати эълон қилган хабарда гап боради.

Жо Байден Россия ва AҚШнинг Европа ва дунёда барқарорликни таъминлаш учун алоҳида масъулиятини таъкидлаб, Вашингтоннинг Украинада ҳужумкор зарба қуролларини жойлаштириш нияти йўқлигини айтган. Шу билан бирга, у Украина атрофида вазият кескинлашган тақдирда Россияга қарши кенг кўламли санкциялар жорий этиш варианти кўриб чиқилаётганини ҳам таъкидлади.

Путин бунга жавобан санкциялар жиддий хато бўлишини, бу Россия-Aмерика муносабатларининг бутунлай узилишига олиб келишини айтган. 

Эслатиб ўтамиз, Россиянинг Украина чегарасида қўшин тўплаши жиддий хавотирларга сабаб бўлмоқда. Ғарб русларни урушга тайёргарликда айбласа, Россия томони НАТОнинг кенгайиши фонида ўз сарҳадларини ҳимоя қилишини рўкач қилмоқда.