АҚШ президенти Дональд Трамп Эрон билан урушнинг чўзилишини хоҳламаяпти ва уни яқин ҳафталар ичида тугатишни режалаштирмоқда. Wall Street Journal нашрига кўра, у маслаҳатчиларига бу можаро «якунловчи босқичга кирганини» айтган.

Маълум қилинишича, Оқ уй 4–6 ҳафталик аниқ муддатни белгилаган ва шу муддат доирада ҳаракат қилмоқда. Ҳатто май ойи ўрталарида Хитой раҳбари Си Цзиньпин билан режалаштирилган учрашувга қадар урушни тугатиш мақсад қилинган.

Трампнинг сўзларига кўра, Эрон раҳбарияти музокараларга қизиқмоқда, аммо ички босим ва хавфлар сабаб буни очиқ айтолмаяпти. У ҳатто Эрон элитаси «ўз халқидан ҳам, АҚШдан ҳам қўрқмоқда» деган фикрни илгари сурди.

Нашрнинг ёзишича, бу баёнот бир неча муҳим жиҳатни очиб беради. Биринчидан, АҚШ урушни чўзилишини истамаяпти – бу иқтисодий босим, нефть нархлари ва ички сиёсий рейтинглар билан боғлиқ. Иккинчидан, ҳатто расмий Теҳрон музокараларни инкор этаётган бўлса-да, Вашингтон дипломатик йўлни фаоллаштиришга ҳаракат қилмоқда.