Хабарлар тезкор Телеграм каналимизда Обуна бўлиш ×

Туркия Украинага сузиб юрадиган электр станциялар етказиб бермоқчи

Туркия Украинага сузиб юрадиган электр станциялар етказиб бермоқчи

Туркиянинг Karpowership компанияси Украинанинг миллий компанияси – «Украина Энергетика компанияси» ОАЖ билан 500 мегаватт қувватга эга сузувчи электр станцияларини Украинага тезкор етказиб бериш бўйича ўзаро англашув меморандумини имзолади.

Karpowership баёнотига кўра, компаниянинг сузувчи электр станциялари 1 миллион хонадоннинг электр энергиясига бўлган эҳтиёжини қондира олади.

Молдова ва Руминия портларида жойлаштириш назарда тутилаётган сузувчи электр станциялар Украина тармоқларига электр энергиясини етказиб беришда асосий ечимлардан бири сифатида кўрилмоқда. Karpowership ва Украина Энергетика компанияси Руминия ва Молдова ҳукуматлари билан ушбу ечимни амалга ошириш бўйича музокаралар олиб боради.

Ўзаро англашув меморандуми доирасида 500 мегаватт қувватга эга сузувчи қувватли кемалар тезда электр энергиясини етказиб беришни бошлаши кўзда тутилган. Ҳар икки томон зарур рухсатларни олиш ва учинчи шахслар билан ҳамкорлик қилиш учун биргаликда ҳаракат қилади.

Karpowership савдо гуруҳи президенти Зейнеп Харези, компания Украинадаги электр инқирозини ҳал қилиш учун иккинчи томон билан ҳамкорлик қилишдан мамнунлигини билдириб, «сузувчи электр станциялари электр тақчиллигига қарши тез, ишончли ва мослашувчан ечимлар»ни таклиф қилишини таъкидлаган.

«Украина Энергетика компанияси» ОАЖ ижрочи директори Виталий Бутенко эса Украина энергия тизими Россия томонидан 12 та йирик ҳужумга дуч келганини ва бунинг натижасида электр ишлаб чиқариш ва инфратузилмага жиддий зарар етганини қайд этиб: «Уруш давом этар экан, бу қувватни қайта тиклаш учун янги электр станциялари қуришнинг иқтисодий маъноси йўқ. Karpowership технологияси эса янги энергия ишлаб чиқариш қувватларини тезда ишга тушириш ва Украина тармоғига ўтказиш имконини беради», дея ўз баҳосини берган.

Маълумот учун, Туркиянинг Karpowership 36 та сузувчи кемадан иборат 6 гигаватт электр энергияси ишлаб чиқариш қувватига эга компания ҳисобланади.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг