Жума тонгидан буён Украина ҳудудларида энергия инфратузилмасига қарши зарбалар деярли кузатилмади. Бу ҳақда президент Зеленский маълум қилди. Истисно сифатида Донецк вилоятида газ инфратузилмасига авиа бомба орқали берилган ягона зарба қайд этилган.

Шу билан бирга, Россия томони зарбалар йўналишини ўзгартириб, логистика ва транспорт тугунларини нишонга олаётгани кузатилмоқда. Хусусан, Днепропетровск вилоятида «Укрзалізниця»га тегишли махсус темирйўл вагони — электр энергияси ишлаб чиқарувчи ҳаракатланувчи станция зарбага учради. Ҳодиса жума куни эрталаб содир бўлган.

Украина расмийларининг таъкидлашича, барча ҳудудларда темирйўл ходимлари ишни узлуксиз давом эттирмоқда ва транспорт алоқалари сақланиб қолган.

Кун давомида дронлар ва авиа бомбалар билан одатий ҳужумлар ҳам тўхтамади. Харьков вилоятида баллистик ракета Америкага тегишли Philip Morris компаниясининг омборларига зарба бериб, катта ёнғинга сабаб бўлди. Шунингдек, Никополь ва Херсон шаҳарлари, Харьков, Суми ва Чернигов вилоятларининг чегара ҳудудлари ҳам ўққа тутилди.

Украина томонининг билдиришича, мамлакатнинг позицияси тўлиқ ўзаро тамойилга асосланади. АҚШ томони бир ҳафта давомида энергия инфратузилмасига зарба бермаслик таклифини илгари сурган ва ҳисоб-китоб шу тундан бошланган.

«Вазият қандай ривожланиши кўп жиҳатдан шерикларимиз — биринчи навбатда АҚШга боғлиқ. Украина бундай чекловларга жавобан ўзаро ҳаракат қилишга тайёр ва бугун Россиянинг энергия объектларига ҳужум қилмади», – дея таъкидланди расмий баёнотда.