Англиянинг Ливерпул шаҳрида бокс бўйича жаҳон чемпионати давом этмоқда. 8 сентябр оқшомида ўзбекистонлик етти нафар боксчи рингга кўтарилди.

Боксчиларимиз жангни -54 кг вазн тоифасида бошлашди — Нигина Ўктамова венгриялик Анна Лакотарни мағлуб этиб (5:0), чорак финалга йўл олди. У 10 сентябрда кейинги босқич йўлланмаси учун рингга кўтарилади.

Навбаҳор Ҳамидова (-65 кг) эса белгиялик Ошин Дериувдан устун келди (4:1).

Шавкатжон Болтаев оғир жангда испаниялик Бернад Мартинезни енгиб (3:0), чорак финалга чиқди.

Тўрабек Ҳабибуллаев (-90 кг) юнон боксчиси Вагкан Нанитзанианни енгди (5:0) ва чорак финалда қозоғистонлик Сағиндик Тоғамбайга қарши жанг ўтказади.

Олимпиада чемпиони Абдумалик Халоков (-60 кг) италиялик Жузеппе Каноникога қарши баҳсни ғалаба билан якунлаб, жаҳон чемпионлиги сари яна бир қадам ташлади.

-75 кг вазнда бўлиб ўтган жангда Фазлиддин Эркинбоев туркиялик Султан Османлини 5:0 ҳисобида мағлубиятга учратиб, чорак финал йўлланмаси эгасига айланди.

Бокс оқшомининг вакилларимиз иштирокидаги сўнгги жангида +90 кг вазн тоифасидаги Жаҳонгир Зокиров германиялик Никита Путилов устидан зафар қучди.

Шу тариқа душанба куни мамлакатимиз шарафини ҳимоя қилган етти нафар боксчимизнинг барчаси 100 фоиз натижа қайд этишди.

Маълумот учун: World Boxing шафелигида илк бор ўтказилаётган катталар ўртасидаги Жаҳон чемпионатида 68 мамлакатдан 554 нафар боксчи қатнашмоқда. Турнир 14 сентябр куни якунига етади.