Европада ортда қолган футбол мавсумининг ҳақиқий кашфиёти, шубҳасиз, Хаби Алонсо бошчилигидаги «Байер» (Германия, Леверкузен) клуби бўлди.

Испания терма жамоасининг собиқ юлдузи, Леверкузенга келганидан сўнг, жамоани бир йил ичида юқори чўққиларга олиб чиқишни уддалади.

Хаби Алонсо ғалабалари сирини очаркан, бунда устозларининг хизматлари катта бўлганини айтиб ўтди.

«Ўз мураббийларимдан кўп нарсаларни ўргандим. Масалан, Бенитесдан тактикани, ўйинга қандай қўшилиб кетишни, қандай ёрдам бериш, нима қилишни ўзлаштирганман. Гвардиола: «Биз бундай ўйнасак, мана бундай бўлади дерди». Моуриниода куч ва муомала қилиш хусусияти устун. Арагонес ўзимга бўлган ишончни оширган, аниқ нимани хоҳлаётганимни аниқлашда ёрдам берган. Дел Боске муайян вазиятда айнан нимага эътибор қаратишни ўргатган. Анчелотти эса яхши футбол нималигини ва бунинг учун нима қилиш кераклигини тўғри тушунтирган», — деди Хаби Алонсо.

Алонсо мураббийлик фаолиятини 2018 йилда «Реал Мадрид» ёшлар жамоасида бошлаган. 2022 йилнинг 5 октябридан — «Байер» бош мураббийи.

2024 йилнинг 14 апрелида «фармацевтлар» ўзларининг 120 йиллик тарихида биринчи марта Германия чемпиони бўлишди. Ўтган ҳафта эса Германия кубоги қўлга киритилди — Алонсо жамоаси билан илк олтин дублни қайд этди.

28 май куни Хаби Алонсога Европанинг энг яхши мураббийи соврини топширилди (Globe Soccer Awards-2024).