OpenAI компанияси ўзининг навбатдаги энг кучли сунъий интеллект модели — GPT-5.6 ни расман тақдим этди. Бироқ янги тизимнинг кенг омма учун ишга туширилиши ҳозирда фақат АҚШ ҳукуматининг якуний рухсатига боғлиқ. Янги авлод тизими турли вазифаларга мослаштирилган учта моделдан иборат:

• Sol — энг кучли ва мураккаб вазифаларни бажарувчи модел. Унинг 1 миллион токен (тахминан 750 минг сўз) учун нархи — кириш $5, чиқиш $30 этиб белгиланган.
• Terra — нарх ва сифат мувозанати таъминланган ўртача модел. Кириш $2,50, чиқиш $15.
• Luna — энг тезкор ва молиявий жиҳатдан энг ҳамёнбоп вариант. Кириш $1, чиқиш $6.

Гарчи ОpenAI янги моделлар тизимини шу йилнинг 26 июнида эълон қилган бўлсада, ҳозирда ундан фақат чекланган доирадаги кишиларгина фойдаланишмоқда. АҚШ ҳукумати томонидан махсус текширувдан ўтган 20 га яқин йирик ташкилотлар тизимни синовдан ўтказиш имкониятига эга бўлишди.

Бундай чекловлар АҚШ Президенти Дональд Трамп томонидан 2026 йил 2 июнда имзоланган янги фармон билан боғлиқ. Унга кўра, маълум бир қувват даражасидан юқори бўлган барча сунъий интеллект моделлари оммавий тақдим этилишидан олдин давлат хавфсизлик хизматлари томонидан мажбурий текширувдан ўтиши шарт. ОрenAI ушбу тартибга ихтиёрий равишда розилик билдирган. Шу сабабли ҳозирча ChatGPT платформасида янги модел мавжуд эмас ва фойдаланувчилар учун кутиш рўйхати ҳам очилмаган.

Шунга қарамай, моделнинг кенг омма учун очилиш куни жуда яқин. Дунёдаги йирик прогнозлар бозори ҳисобланган Polymarket платформаси иштирокчилари янги моделнинг чиқиш санасини 9 июл деб тахмин қилимоқда.

Бундан ташқари, дастурчилар учун мўлжалланган Codex иловасининг сўнгги янгиланишларида Sol модели учун махсус тезлик созламалари пайдо бўлган. Бу сунъий интеллект оламидаги навбатдаги йирик қадамнинг техник жиҳатдан тўлиқ якунлангани ва фақат ҳуқуқий рухсатнома кутилаётганидан далолат беради.