Дунё ҳамжамияти Ғазода нафақат қуролли зиддият, балки ҳақиқат ва ёлғон ўртасидаги ахборий курашга ҳам гувоҳ бўлмоқда. Бу ҳақда Туркия президенти девони Коммуникациялар бошқармаси раҳбари Фахриддин Алтун Истанбулда ўтаётган халқаро анжумандаги нутқида гапирди.

24 ноябрь куни бошланган Халқаро стратегик коммуникация саммитида (Stratcom Summit) Ўзбекистон вакиллари ҳам қатнашмоқда.

«Исроил Ғазо секторида 64 нафар ОАВ ходимини ўлдирди. Бу жараёнда Исроил фашистик пропаганда усулини қўллаган ҳолда журналистлар, тиббиёт ходимлари, аёллар ва болалар билан бирга ҳақиқатни ҳам ўлдирмоқда», – деди Фахриддин Алтун.

Туркия расмий мулозимига кўра, Исроил элитаси Фаластинга қарши ғайриқонуний босқинини хаспўшлаш учун кўп йиллардан буён Ғарб ҳамжамиятида Ислом дини борасида янглиш тасаввурни шакллантиришга уринмоқда.

Профессор Ф.Алтун айни пайтда Ғазода давом этаётган урушда ҳам яҳудий давлати фаластинликларни инсонийликдан маҳрум қиёфада кўрсатишга уринаётганини кескин қоралаган. Бу борада Ғарбнинг етакчи медиаширкатлари ҳам колониал тафаккур таъсиридан қутула олмаётганига эътибор қаратган.

«Биз пандемия даврида тизимли дезинформация сиёсатининг қанчалик ҳалокатли оқибатлар келтириб чиқаришини жуда аниқ бир шаклда кўрдик. Бутун дунё Россия–Украина урушида ҳам шундай ҳолатга гувоҳ бўлмоқда. 7 октябрдан бери жумлаи жаҳон кўз ўнгида рўй бераётган Ғазо қирғинида тизимли дезинформация сиёсати ҳақиқатни қандай бузиб кўрсатаётганини янада аниқроқ кўраётирмиз», – деди Ф.Алтун.

Сиёсатчи ўз нутқида васийлик урушлари, сиёсий ва халқаро ҳуқуқ манипуляцияси, иқтисодий босим, киберҳужумлар, дезинформацион муҳорабаларни жиддий таҳдидлар сифатида қайд этган.

Дезинформацион кампаниялар ҳақиқат инқирозига олиб келаётганини урғулаган Ф.Алтун Туркия зулм ва шафқатсизлик қаршисида асло томошабин бўлиб турмаслигини таъкидлаган.

Анжуман давомида Фаластин–Исроил ихтилофида Ғарб мамлакатларининг иккиёқлама стандартларни маъқул кўраётгани танқид қилинди.

«Тарих Қуръони каримга қилинган ҳужумларни сўз эркинлиги дея талқин этган бугунги Европанинг Фаластин байроғига ва тинчлик чақириқларига нисбатан қилаётган муросасизлигини унутмайди», – деди Туркия ташқи ишлар вазири Хоқон Фидан.

Туркия Коммуникациялар бошқармаси томонидан учинчи бор ташкил этилган Stratcom саммитида нуфузли халқаро ташкилотлар вакиллари, атоқли экспертлар қаторида Ўзбекистон делегацияси – АОКА, Тараққиёт стратегияси маркази ва ЎзЖОКУ раҳбарияти ҳам қатнашмоқда.

Тадбир иштирокчиларига БМТнинг глобал коммуникациялар бўйича бош котиби ўринбосари Мелисса Флеминг ва Туркия президенти Ражаб Тоййиб Эрдўғон видеомурожаат йўллаган.