Isroil armiyasining hujumlari tufayli G‘azo sektorining shimolidagi Al-Shifo kasalxonasini tark etishga majbur bo‘lgan falastinlik Neziha Avad, to‘yib ovqatlanmaslik tufayli vazni 2 kgga tushib ketgan uch egizagi hayotidan xavotirda.

18 mart kuni Isroil armiyasi minglab bemor va ko‘chirilgan aholi boshpana topgan Al-Shifo kasalxonasiga keng ko‘lamli reyd o‘tkazdi. Reyd davomida Isroil kuchlari 800 dan ortiq odamni hibsga oldi va so‘roq qildi, 170 dan ortiq falastinlikni o‘ldirdi.

Isroil hujumlari tufayli G‘azo sektorining janubiga ko‘chib o‘tishga majbur bo‘lgan 44 yoshli falastinlik ayol uch egizaklari — Melek, Xidir va Mustafo uchun sut ham topa olmayotganini ma’lum qildi. Shuning uchun chaqaloqlar vazn yo‘qotishmoqda va ularning sog‘lig‘ida muammolar kuzatilmoqda.

Avadning ta’kidlashicha, u olti kun davomida Isroil armiyasi qurshovidagi Al-Shifo kasalxonasida juda og‘ir sharoitlarda bo‘lgan. So‘ng, u bolalari bilan G‘azo sektorining shimoliy qismidan janubga qarab ketgan.

«Uch egizagim va men to‘yib ovqatlanmaslikdan aziyat chekkanmiz, janubga ko‘chib o‘tish uchun G‘azo shahridagi Al-Shifo kasalxonasini tark etishga majbur bo‘ldik», dedi falastinlik ayol.

Avadning so‘zlariga ko‘ra, u farzandlari bilan hozirda boshqa ko‘chirilgan falastinliklar qatori chodirda.

«Farzandlarim sut va oziq-ovqat etishmasligi tufayli to‘yib ovqatlanmaslikdan aziyat chekmoqda va ular juda ko‘p vazn yo‘qotishdi», deb afsuslanadi Avad.

Uning qayd etishicha, uch egizak aslida 8 kg vaznda bo‘lishi kerak, biroq ularning vazni 2 kg gacha tushib ketgan, bu ularning salomatligi uchun o‘ta xavfli va sog‘liqni saqlash standartlariga javob bermaydi.

Avad uch egizaklarining hayotidan xavotirda ekanligini aytib, tez yordam so‘raydi.

Falastinlik ayol uch egizak qolishga majbur bo‘lgan «chidab bo‘lmas sharoitlar»ga e’tibor qaratdi, shuningdek, ular tiklanishi uchun ularga oziq-ovqat va tibbiy yordam so‘radi.

G‘azo sektorining shimolidagi yashash sharoiti tom ma’noda «halokatli».

G‘azoning 2,3 million aholisi Isroilning havo, quruqlik va dengizdagi ommaviy bombardimonlari hamda blokada tufayli oziq-ovqat, suv va dori-darmon tanqisligidan aziyat chekmoqda. Mintaqada katta gumanitar falokat yuz bermoqda.

Minglab binolar, jumladan kasalxonalar, masjidlar va cherkovlar ham Isroilning havo va quruqlik hujumlari natijasida zarar ko‘rgan yoki butunlay vayron bo‘lgan.

2023 yil 7 oktabrdan beri G‘azo sektoridagi Isroil hujumlari qurbonlari soni 32,4 ming kishidan oshdi, 74,7 mingdan ortiq kishi jarohat oldi.

Halok bo‘lganlarning jasadlari hali ham vayron bo‘lgan binolar ostida va yo‘l chetlarida qolmoqda. Tez yordam va fuqaro mudofaa guruhlari Isroil kuchlarining to‘siqlari tufayli ularga yetib bora olmayapti.