Dunyo tajribasi ko‘rsatadiki, kadrlar tayyorlashning «ta’lim-fan-ishlab chiqarish» integratsiyasiga asoslangan moduli samarali hisoblanadi. Shu maqsadda TIQXMMIning barcha fakultetlarida o‘z yo‘nalishlari bo‘yicha ko‘plab innovatsion markazlar ochilib, talabalarga ulkan imkoniyatlar yaratilmoqda.

TIQXMMI matbuot xizmati rahbari Rahimboy Jumaniyozovning xabar berishicha, bugun, 19-noyabr kuni Toshkent irrigatsiya va qishloq xo‘jaligini mexanizatsiyalash muhandislari instituti «Suv xo‘jaligini tashkil etish va boshqarish» fakultetida talabalarni bilim va ko‘nikmalarini yanada oshirish va hozirgi dunyo talabiga mos mutaxassis bo‘lib yetishib chiqishi maqsadida ATB Turonbank bilan hamkorlikda innovatsion ilmiy-amaliy tadqiqot markazining ochilishi marosimi bo‘lib o‘tdi.

Tadbirda institut rektori, professor O‘ktam Umurzoqov va ATB «Turonbank» boshqaruvi raisi Chori Mirzayevlar hamkorlikdagi faoliyatning mohiyati haqida fikr bildirishdi.

Institutda olingan nazariy bilimlar va yangi tashkil etilgan innovatsion ilmiy-amaliy tadqiqot markazida berilgan ko‘nikma talabalarga bevosita bank filiallarida amaliyot olib borish imkoniyatini yaratib beradi.

Shu bilan birga bu hamkorlik professor-o‘qituvchilar malakasini oshirishga xizmat qiladi. Ta’lim yo‘nalishida o‘qitilayotgan fanlarni bankning amaliyotchi mutaxassis xodimlari tomonidan real holatdan kelib chiqqan holda baholanishi, tahlil qilinishi professor-o‘qituvchilar va talabalar uchun foydali hisoblanadi.

Qayd etishilicha, institutning barcha fakultetlarida davlat korxonalari ilmiy-amaliy markazlari ochilishi davomli bo‘lmoqda va kelgusida ham aynan «Suv xo‘jaligini tashkil etish va boshqarish» fakultetida bu kabi innovatsion markazlarni Agrobank xamda Xalq banki bilan hamkorlikda tashkil etish rejalashtirilgan.