Avtomobilsozlik olamida so‘nggi yillarda kuzatilgan «hamma narsani ekran orqali boshqarish» trendi o‘z nihoyasiga yetmoqda. Xitoy hukumati avtomobil ishlab chiqaruvchilar oldiga qat’iy talab qo‘ydi: 2027-yil iyulidan boshlab avtomobillarda asosiy funksiyalar uchun jismoniy tugmalar va tumblerlar bo‘lishi shart!

Ko‘plab texnologik gigantlar, xususan, Tesla kabi kompaniyalar avtomobil salonini minimalistik qilib, barcha boshqaruvni markaziy displeyga ko‘chirishga intilayotgan edi. Biroq, xavfsizlik va ergonometrika bo‘yicha mutaxassislar buni haydovchining diqqatini yo‘ldan chalg‘ituvchi asosiy omil deb hisoblamoqda.

Ekranlarda menyular orasida adashib qolish yoki virtual tugmani bosish uchun ko‘zni yo‘ldan uzish soniyalar ichida halokatli oqibatlarga olib kelishi mumkin. Xitoyning bu qarori avtomobil boshqaruvini yanada intuitiv va xavfsiz qilishni maqsad qilgan.

Yangi qoidalarga ko‘ra, ishlab chiqaruvchilar quyidagi 19 ta funksiyani sensorli displeydan chiqarib, ularni alohida jismoniy tugmalar, tumblerlar yoki mexanik datchiklar orqali boshqarishni ta’minlashi shart:

• Burilish chiroqlari va avariya signalizatsiyasi;
• Oyna tozalagichlar (dvorniklar) va oynalarni isitish tizimi;
• Ovozli signal va kruiz-kontrol tizimi.

Uzatmalar qutisini displey orqali (Tesla uslubida) o‘zgartirish taqiqlanadi. Endilikda mexanik yoki klassik selektorlar qaytadi.

Bu talab Xitoy bozorida faoliyat yuritayotgan barcha mahalliy va xorijiy brendlarga taalluqlidir. Mutaxassislarning fikricha, ushbu qadam avtomobil intereri dizaynini butunlay o‘zgartirib yuboradi.

«Sensorli displey — bu qulay, ammo u jismoniy tugmaning ishonchliligini bera olmaydi», deydi sanoat tahlilchilari. Avtomobilsozlar endi nafaqat dasturiy ta’minot, balki ergonomik mexanika ustida ham jiddiy ishlashlariga to‘g‘ri keladi.

Xitoyning ushbu tashabbusi kelajakda boshqa mamlakatlarda ham xavfsizlik standartlarini qayta ko‘rib chiqishga turtki bo‘lishi mumkin. Haydovchilar esa qadrdon tugmalarning qaytishini ijobiy qarshi olmoqda, chunki mashina boshqaruvi endilikda «planshet» emas, balki haqiqiy mexanizmga yaqinlashadi.

Ushbu qaror global avtomobil bozorida «raqamli minimalizm» davri tugab, «xavfsiz ergonomika» davri boshlanayotganidan darak beradi. Sizningcha, mashina salonida tugmalarning bo‘lishi haydashni xavfsizroq qiladimi yoki bu texnologik taraqqiyotdan ortga qadam tashlashmi?