Isroilga qarshi kurashish maqsadida Eron maxsus xizmatlari tizimida tashkil etilgan bo‘linmaga «Mossad» agenti boshchilik qilib kelgan. Bu haqda Eronning sobiq prezidenti Mahmud Ahmadinajod ma’lum qilgan.

«Biz Isroilga qarshi kurashish uchun bo‘linma tashkil etdik, unga boshchilik qilgan shaxs esa «Mossad» josusi bo‘lib chiqdi», – degan fors davlatiga 2005-2013 yillarda prezidentlik qilgan Ahmadinajod.

Sobiq davlat rahbari boshqa tafsilotlarni ochiqlamagan.

Ushbu shov-shuvli bayonot Yaqin Sharqdagi qudratli tuzilmalardan biri, Tehronning yaqin ittifoqchisi «Hizbulloh» harakati rahbari Hasan Nasrulloh Isroil armiyasi tomonidan o‘ldirilgani fonida yangramoqda.

Mahmud Ahmadinajod tomonidan matbuotga sizdirilgan ushbu fakt avvalroq «Le Parisien» gazetasi ilgari surgan taxminni tasdiqlaydi.

Fransuz nashriga ko‘ra, «Hizbulloh» tarkibiga kirib olgan, Isroil foydasiga ishlab kelgan eronlik agent Nasrullohning manzilini Tel-Avivga yetkazgan. Isroil harbiylari shu ma’lumot asosida o‘n yillar davomida tayyorgarlik ko‘rib kelgan rejasini amalga oshirgan: «Hizbulloh» yetakchisini mahv etgan.