Isroil mudofaa kuchlari shtab boshlig‘i Eyal Zamir mamlakat qurolli kuchlarini yuqori tayyorgarlik holatiga keltirishni buyurdi.

U yaqin kelajakda Eronga qarshi harbiy operatsiyalarni qayta boshlanishi mumkinligini istisno qilmadi, deb xabar beradi Isroilning Ynet nashri manbalarga tayanib. 

Ynet manbalariga ko‘ra,  mudofaa kuchlari Isroilning avvalgi operatsiyalariga o‘xshashi mumkin bo‘lgan harbiy harakatlarga tayyorgarlik ko‘rmoqda. Bundan tashqari, nashr manbalarining qo‘shimcha qilishicha,«barcha rejalashtirish jarayonlari» tezlashtirilgan. 

Ayni paytda, Isroilning Harbiy razvedka boshqarmasi Erondagi harbiy nishonlar ro‘yxatini tuzmoqda, deb xabar beradi Ynet. Nashrning xabar berishicha, bular asosan raketa tizimlari va uchirish moslamalarini o‘z ichiga oladi.

Biroq, nashr manbalari harbiy harakatlar bo‘yicha qaror hali qabul qilinmaganligini va bu choralar «har qanday ssenariyga to‘liq tayyor bo‘lish» uchun zarurligini ta’kidlamoqda. 

8-apreldan beri AQSh, Isroil va Eron o‘rtasida ikki haftalik sulh amal qilmoqda. Bu vaqt ichida tomonlar tinchlik kelishuviga erishishi kutilmoqda. 12-aprel kuni Pokiston vositachiligida Eron-AQSh muzokaralari yakunlandi. AQSh vitse-prezidenti J.D. Vens Eron AQSh tomonining shartlarini qabul qilmaganini va Tehron yadroviy qurol dasturidan voz kechishni istamasligini aytdi.

Eron Tashqi ishlar vazirligi tomonlar ikki yoki uchta asosiy masala bo‘yicha kelishuvga erisha olmaganini tasdiqladi, ammo muzokaralar davom etishiga umid bildirdi.