Хитой билан тўқнашувга тайёрланаётган Ҳиндистон Ҳимолай тоғларида катта қурилиш қиляпти, деб хабар берди The Wall Street Journal.

Нашрга кўра, Ҳиндистон Ҳимолай тоғларида йўллар, туннеллар ва учиш-қўниш йўлакларини қуриш учун юзлаб миллион доллар сарфламоқда, бу келажакда ўзининг азалий душмани Хитой билан эҳтимолий тўқнашувга тайёргарликдан нишон.

2020 йилда Ҳиндистон ва Хитой чегарасидаги қонли тўқнашувда ҳар икки томондан аскарлар ҳалок бўлганди. Бу эса 2 200 миллик (3 540 км) баҳсли чегара — «ҳақиқий назорат чизиғи» дея аталувчи ноаниқ демаркация чизиғидаги заифликни кўрсатди.

Хитой неча ўн йиллар давомида ўз чегара ҳудудлари бўйлаб кенг кўламли темир йўллар ва автомобил йўллари тармоғини яратди, Ҳиндистон ўз қуролли кучлари тоғли чегара ҳудудларини кесиб ўтиши учун зарур инфратузилмани барпо этишга уриниб ҳам кўрмаган.

2020 йилда Хитой-Ҳиндистон чегарасида жанглар бошланганида, аскарлар 14 минг фут (4,2 км) баландликда дубинкалар ва тиканли сим ўралган таёқларда қўл жангига киришишган. Таҳлилчиларнинг фикрича, Пекин бир неча соат ичида қўшимча кучга эга бўлиши мумкин эди. Ҳиндистон эса ўнқир-чўнқир ёки умуман йўқ йўллар орқали қўшин келтиришига камида бир ҳафта кетган бўларди.