Россия Қуролли кучлари Бош штаби Бош разведка бошқармаси раҳбарининг ўринбосари Владимир Алексеев Москвада уюштирилган суиқасддан сўнг шифохонада қолмоқда.

Тергов қўмитаси расмий вакили Светлана Петренконинг билдиришича, Владимир Алексеев ҳодиса пайтида бир нечта ўқдан яраланган.

ФСБ маълумотига кўра, суиқасдни амалга оширишда гумонланаётган Россия фуқароси Любомир Корба Дубайда қўлга олиниб, кейин Россияга топширилган. Шунингдек, яна икки нафар эҳтимолий шерик аниқланган: улардан бири Москвада ушланган, иккинчиси эса Украина ҳудудига чиқиб кетгани айтилмоқда.

РИА Новости’нинг ёзишича, Любомир Корба Россия ФСБ томонидан эълон қилинган видеода генерал-лейтенант Владимир Алексеевни ўлдириш буйруғини 2025 йил декабр ойида олганини айтган.

«Декабр ойида мен Бош разведка бошқармаси генерали Алексеевни ўлдириш буйруғини олдим. Бу вазифани бажаришим учун менга 30 минг доллар ваъда қилинган эди», – деди Корба.

Россия ташқи ишлар вазири Сергей Лавров ҳужум учун Украинани айблаб, воқеани «террористик ҳаракат» деб атади ҳамда бу тинчлик музокараларини барбод қилишга қаратилганини билдирди.

Ҳодиса Россия, Украина ва АҚШ вакиллари иштирокида Абу-Дабида ўтган икки кунлик музокаралар якунланганидан бир кун ўтиб содир бўлганди. Ушбу музокаралар Украинада деярли тўрт йилдан бери давом этаётган урушни тўхтатишга қаратилган.