Швециядаги Каролин институти олимлари ген терапияси ёрдамида туғма карликни даволашди, деб хабар берди Euro Puls.

Ген терапияси синовлари давомида туғма карликка эга 10 нафар беморнинг барчасида эшитиш қобилияти тикланди. Бундан ҳатто олимларнинг ўзлари ҳам ҳайратда.

Тадқиқот ушбу касалликни қўзғатувчи OTOF генидаги мутацияни ўрганишга бағишланган эди. Олимларнинг ҳисоб-китобларига кўра, айнан шу мутация жаҳонда 200 мингга яқин кишида эшитиш билан боғлиқ муаммолар сабабчиси бўлиши мумкин.

Тадқиқотчилар организмга товуш сигналларини тўғри узатишда кўмаклашишни мақсад қилишганди. Бунинг учун беморларнинг қулоқларига махсус вирус-ташувчи юборилди — у керакли генни ҳужайраларга етказади. Ҳозирда ген терапияси одатда шундай ишлайди: вирус «душман» эмас, балки бошқариладиган транспорт воситаси вазифасини бажаради.

Швед олимлари ўтказган тадқиқотда бир ёшли кичкинтойлардан тортиб катта ёшли беморларгача — жами 10 нафар беморнинг барчаси эшитишни бошлади. Портал маълумотларига кўра, терапия кичик ёшдаги иштирокчиларда, айниқса 5-8 ёшли гуруҳда энг яхши натижа берди.