Украина президенти Владимир Зеленский мамлакатда тўлиқ миқёсли уруш бошланганининг тўрт йиллиги муносабати билан халққа мурожаат қилди. У илк бор 2022 йил февраль ойидан буён Банковадаги бункерда жойлашган иш кабинетини намойиш этди. Айнан шу ерда урушнинг дастлабки кунларида давлатни ҳимоя қилишга оид энг муҳим қарорлар қабул қилинган.

Президентнинг айтишича, илк халқаро мулоқотлар ҳам шу бинода бўлиб ўтган. У АҚШнинг ўша пайтдаги президенти Жо Байден билан бўлган суҳбатини эслади. Байден Украинага жиддий таҳдид борлигини айтган ва Зеленскийни мамлакатни тарк этишга чақирган.

«Менга «Владимир, хавф бор, сиз зудлик билан Украинадан кетишингиз керак. Биз ёрдам берамиз», дейишди. Лекин менга такси эмас, қурол керак эди», – деди Зеленский.

Президентнинг таъкидлашича, урушнинг биринчи кунларида украиналиклар қўрқув ва шокни бошдан кечирган. Бироқ ҳар ким ички ҳисси билан бошқа Украина йўқлигини ва бу уларнинг уйи эканлигини англаган. Шу куни миллионлаб инсонлар ўз танловини қилган.

«Бизнинг одамлар оқ байроқ кўтармади, балки кўк-сариқ байроқни ҳимоя қилди», – деди у.

Зеленскийнинг сўзларига кўра, босқинчилар тез таслим бўлишни ёки қўллаб-қувватлашни кутган, аммо бунга жавобан мамлакатдаги ҳарбий комиссариатлар олдида навбатлар пайдо бўлган. Ҳарбийлар фронтда мудофаани ушлаб турган бир пайтда, тинч аҳоли ҳам шаҳар ва қишлоқларни ҳимоя қилишга чиққан. Айрим ҳолларда одамлар душман техникасини ўз танаси билан тўсишга ҳаракат қилган.

Президент бутун дунё Украина қаршилигининг кўламини кўрганини таъкидлади. Европа шаҳарларида минглаб одамлар кўк-сариқ байроқлар билан майдонларга чиқиб, Украинани қўллаб-қувватлашини билдирган.

Урушнинг оғир кунлари, ҳафталари ва ойларидан сўнг, мамлакат босқичма-босқич барқарорликни шакллантира бошлаган. Зеленскийнинг айтишича, 2022 йил баҳори бурилиш нуқтасига айланган.

«Ўша пайт биринчи марта «Қўлимиздан келади! Украина уддалайди! » деган фикр пайдо бўлган»,  – деди у.

Президент сўнгги йиллардаги фожиаларни ҳам ёдга олди: Буча, Ирпень, Бородянка, Мариуполь, Краматорск, Еленовка, Каховка тўғонининг вайрон қилиниши, Запорожье атом электр станцияси атрофидаги вазият. Унинг таъкидлашича, туғуруқхоналар, турар жойлар ва вокзалларга берилган зарбалар Украина учун ўчмас дардга айланган.

Шу билан бирга, Зеленский украиналиклар қўрқув ёки ғазабга таслим бўлмаганини айтди. Унинг фикрича, мамлакатни паноҳгоҳларга киришга мажбур қилиш мумкин, аммо уни бўйсундириш мумкин эмас.

Мурожаат якунида у Украина ўз ерида яшаш ва келажагини мустақил белгилаш ҳуқуқи учун курашни давом эттираётганини таъкидлади.