АҚШ президенти Дональд Трамп ва Россия президенти Владимир Путин ўртасида 3 соат давом этган учрашув Украинада тинчлик ўрнатишга доир аниқ қадамларсиз якунланди. Иккала томон ҳам натижаларни «маъқул» деб белгилаган бўлса-да, аниқ келишувлар эълон қилинмади.

Аляскадаги Элмендорф-Ричардсон ҳарбий базасида бўлиб ўтган учрашув иккала президентнинг 2019 йилдан бери илк шахсий учрашуви, шунингдек, Россиянинг Украинага тўлиқ масштабдаги ҳужумидан кейин Путиннинг АҚШ президенти билан илк мулоқоти бўлди.

Учрашув аввалида маълум қилинган режага кўра, улар фақат таржимонлар иштирокида бирга гаплашиши керак эди, лекин кейин формат ўзгарди – музокараларга АҚШ давлат котиби Марко Рубио, Россия ташқи ишлар вазири Сергей Лавров, шунингдек икки давлат махсус вакили ҳам қўшилди.

Учрашувда жиддий келишувлар бўлмади. Путин Трампга миннатдорчилик билдирди ва Украинадаги урушнинг «асосий сабабларини бартараф этиш» кераклигини таъкидлади.

«Украина — бизнинг қардош халқимиз, у ердаги воқеалар биз учун фожиа. Барқарор тинчлик учун асосий сабабларни йўқотиш керак. Украина хавфсизлиги таъминланиши шарт. АҚШ билан ҳамкорлик салоҳиятга эга», – деди Путин.

Унинг сўзича, агар 2022 йилда президент Трамп бўлганида, уруш бошланмаган бўларди.

Трамп эса ҳозирча «битим йўқ»лигини, лекин «салмоқли қадамлар ташлангани»ни айтди. У Путиннинг урушни тугатишни исташига ишонч билдирди.

«Биз тўлиқ келиша олмадик, ҳозирча битим йўқ. Лекин прогресс бор. Европа раҳбарлари ва Зеленский билан маслаҳатлашаман. Биз урушни тезроқ тугатишни хоҳлаймиз. Ҳар ҳафта минглаб одамлар ҳалок бўлмоқда. Путин ҳам, мен ҳам буни тугатиш тарафдоримиз», – деди Трамп.

 Кейинги учрашув ҳақида гап кетганда, Путин Трампни Москвага таклиф қилди.

Учрашувдан кейин дастлаб режалаштирилган кенгайтирилган форматдаги ишчи тамадди бекор қилинди. Путин шу заҳоти Аляскада ҳалок бўлган совет учувчилари қабрига гул қўйди ва маҳаллий архиепископ билан учрашди. Кейин эса Россияга қайтиб кетди.