Чўлпон-Ота шаҳрида (Қирғизистон) бўлиб ўтган Қозоғистон, Қирғизистон ва Ўзбекистон энергетика ва сув хўжалиги бошқармаларининг уч томонлама учрашуви якунларида минтақадаги сув-энергетика балансини тартибга солувчи бир қатор протоколлар имзоланди.

Асосий ҳужжат Қозоғистон ва Ўзбекистондан Қирғизистонга электр энергияси етказиб бериш эвазига Тўқтўғул сув омборидан сув чиқаришни таъминлаш бўйича томонларнинг мажбуриятларини белгилайди. Шунингдек, Қозоғистон энергетика тизимлари орқали Россиядан Қирғизистонга электр энергияси транзити шартлари келишиб олинди. Ушбу чора-тадбирлар сув омборида зарур сув даражасини сақлаб туриш ва келгуси вегетация даврида Қозоғистоннинг жанубий вилоятларини суғориш суви билан таъминлашга қаратилган.

Ташриф давомида икки томонлама музокаралар ҳам ўтказилди. Ўзбекистон томони билан Қозоғистонга 2026 йилнинг мартидан декабригача бўлган даврда қарийб 900 миллион кВт/соат электр энергияси етказиб бериш тўғрисида протокол имзоланди. Ушбу ҳажм Қозоғистоннинг жанубий энергетика зонасида электр станцияларида таъмирлаш ишлари олиб борилаётганда прогноз қилинаётган танқисликни қоплашга мўлжалланган.

«Сув-энергетика соҳасидаги ишлар максимал аниқлик ва графикларга қатъий риоя қилишни талаб қилади. Имзоланган протоколлар аниқ рақамлар, муддатлар ва нархлар кўрсатилган ишчи ҳужжатлардир», - деди Қозоғистон энергетика вазири Эрлан Аккенженов.

Шунингдек, у  томонларнинг ўз мажбуриятларини бажариши бутун минтақа учун энергия тизимлари ва сув таъминоти барқарорлиги учун асос бўлишига урғу берган.