Технология олами ва футбол дунёсининг энг йирик вакиллари кутилмаган тарзда бирлашди. Энг йирик сунъий интеллект лабораторияси — OpenAI компанияси сайёрамизнинг энг машҳур футболчиси, Жаҳон чемпиони Лионел Месси билан расмий глобал ҳамкорлик бошланганини эълон қилди. Ушбу кампания ОАВ томонидан сунъий интеллект тарихидаги илк глобал футбол мавсумининг бошланиши сифатида баҳоланмоқда.

Ҳамкорлик доирасида тақдим этилган илк эксклюзив видеороликда Месси ChatGPT Images (DALL-E 3) имкониятларидан фойдаланиб, ўзининг суратини янгича кўринишда тасаввур қилади. У чат-ботга ўз сочларини Аргентина байроғи рангларига (оқ ва ҳаво ранг) бўяш, аммо бунда табиийликни сақлаб қолиш ҳақида буйруқ (промпт) беради. Тайёр бўлган суратни эса Аргентина терма жамоаси аъзолари бор умумий чатга юборади.

OpenAI маркетологлари ушбу кампанияни шунчаки реклама эмас, балки мухлислар учун интерактив воситага айлантиришди. Футбол юлдузи томонидан ишлатилган аниқ матнли буйруқ ChatGPT тизимига тайёр андоза (preset style) сифатида жойланди.

Эндиликда бутун дунёдаги миллионлаб мухлислар ўз суратларини юклаб, Мессининг ушбу промптидан фойдаланган ҳолда сочларини ўз ватанлари ёки севимли жамоалари байроғи рангларига бўяшлари мумкин. Ижтимоий тармоқларда ушбу тренд #MessiMode ҳештеги остида оммалашмоқда.

Лионел Мессининг расмий баёнотидан:

“Менга ҳар бир давлатда одамлар футболни қандай турлича ҳис қилиши ва ундан завқланишини кузатиш доимо ёққан. Мен ўз мухлислигимни янгича усулда ифодалаш учун ChatGPTга мурожаат қилдим ва албатта, биринчи навбатда Аргентина рангларини танладим. Ўйлайманки, бу мавсумда кўплаб мухлислар сунъий интеллект ёрдамида ўйинларни кузатиш, майдондаги ҳолатларни яхшироқ тушуниш ва ўз жамоаларини қўллаб-қувватлашнинг янги йўлларини кашф этадилар”.

Ғарб молиявий ва маркетинг нашрларининг таҳлилларига кўра, OpenAI ушбу қадам орқали ChatGPTни шунчаки матнли ёрдамчи эмас, балки жонли спорт тадбирларининг ажралмас қисмига айлантиришни мақсад қилган.

Статистикага кўра, сўнгги бир ҳафтанинг ўзида фойдаланувчилар томонидан ChatGPTга футбол ва турнирларга оид 17 миллиондан ортиқ сўровлар юборилган. Мухлислар СИ ёрдамида нафақат суратлар яратишмоқда, балки терма жамоалар таркиби, ўйинлар таҳлили, прогнозлар ва учрашувлар жадвали ҳақида маълумот олишмоқда. Instagramда 500 миллиондан ортиқ кузатувчига эга бўлган Месси эса ушбу оммавий талабни OpenAI фойдасига капиталлаштирувчи асосий глобал қиёфага айланди.

Шуниси қизиқки, жорий йилнинг январ ойида берган интервьюларидан бирида Месси кундалик ҳаётда сунъий интеллект ёки ChatGPTдан умуман фойдаланмаслигини, оилада фақат рафиқаси Антонела ушбу технологияларга қизиқишини тан олган эди. Аммо орадан бир неча ой ўтиб, айнан у OpenAI тарихидаги энг йирик амбассадорга айланди.

Тармоқ кузатувчиларининг фикрича, ушбу кампания мухлисларни фақат томошабин бўлишдан тўхтатиб, уларни контент яратувчиси сифатида футбол экотизимига жалб қилишда янги даврни бошлаб беради.