Миллионлаб инсонлар тўрт йил давомида интизорлик билан кутган лаҳзалар етиб келди. Сайёрамизнинг энг машҳур, энг шиддатли ва нуфузли спорт байрами — футбол бўйича 2026 йилги Жаҳон чемпионати расман старт олди! Бу сафарги мундиал аввалгиларидан мутлақо фарқ қилади, чунки биз футбол тарихидаги янги эранинг гувоҳига айланиб турибмиз.

АҚШ, Канада ва Мексика яшил майдонлари мезбонлик қилаётган ушбу турнир ўзининг кенг кўламлилиги ва иқтисодий қудрати билан рекордларни аллақачон янгилаб бўлди.

ФИФА Кенгаши томонидан ЖЧ–2026 учун ажратилган рекорд даражадаги 727 миллион долларлик умумий бюджет ва 655 миллион долларлик соф соврин жамғармаси турнирнинг нақадар улкан аҳамиятга эга эканидан далолат беради.

Майдонда нафақат Жаҳон чемпионлиги олтин кубоги ва бош соврин ҳисобланган 50 миллион долларлик рекорд мукофот пули, балки ўз ватани шарафини ҳимоя қилаётган энг кучли терма жамоаларнинг бор умид ва иштиёқи тўқнашади.

Жаҳон чемпионатининг финалигача етиб бориб, кумуш медал билан кифояланган иккинчи финалчи эса 33 миллион доллар мукофот пулига эга чиқади.

Шунингдек, кучли учликни якунлаб, бронза медали соҳибига айланган терма жамоа 29 миллион доллар ишлаб топса, мусобақада тўртинчи ўринни эгаллаган жамоа ғазнаси 27 миллион долларга бойийди.

Бундай йирик молиявий рағбат нафақат футбол нуфузини, балки майдондаги рақобатни ҳам янги босқичга олиб чиқади. 50 миллион долларлик бош соврин исталган мамлакат футболи ривожи учун улкан инвестиция бўла олади.

​Янги форматдаги турнирда ҳатто плей-оффнинг илк босқичларига чиқиш ҳам жамоалар бюджетини сезиларли даражада бойитади. ФИФА мукофотларни босқичлар кесимида жуда жозибадор тарзда тақсимлаган. Мусобақанинг чоракфинал (1/4) босқичигача етиб келган омадли жамоаларга 19 миллион доллардан берилади. Нимчоракфинал, яъни 1/8 финал иштирокчилари эса 15 миллион доллардан қўлга киритишади.

Плей-оффнинг илк довони — 1/16 финалга чиққан терма жамоаларнинг ҳар бирига 11 миллион доллардан ажратилади. Ҳатто омади чопмай, мусобақани гуруҳ босқичидаёқ тарк этадиган терма жамоалар ҳам қуруқ қўл билан қайтишмайди, уларга 9 миллион доллардан кафолатланган маблағ берилади.

​ФИФА раҳбарияти ушбу йирик турнирда иштирок этувчи ҳар бир мамлакатнинг харажатларини қоплашни ҳам олдиндан ўйлаб қўйган. Бюджетдан ташқари, ЖЧ–2026нинг ҳар бир иштирокчисига йўл ва тайёргарлик жараёнларини юқори даражада ташкил этиш учун қўшимча 1,5 миллион доллардан нақд пул маблағи ажратилади.

Шубҳасиз, ЖЧ–2026 нафақат майдондаги шиддатли ўйинлари, балки спорт иқтисодиёти тарихидаги энг даромадли ва муваффақиятли лойиҳа сифатида ҳам йилномалардан жой оладиган бўлди.

Илк бор 48 та жамоа иштирокида ўтаётган ушбу тарихий мундиалда ҳар бир учрашув ҳақиқий финалга айланиши шубҳасиз. Хўш, футбол оламининг янги қироли ким бўлади?