Қишлоқ хўжалиги вазирлиги тузилмасида давлат-хусусий шериклик асосида Органик қишлоқ хўжалиги ва озиқ-овқат маҳсулотларини ишлаб чиқаришга ихтисослаштирилган агрокластер ташкил этилади. Бу ҳақда «Озиқ-овқат хавфсизлигини таъминлашнинг қўшимча чора-тадбирлари тўғрисида»ги президент қарори лойиҳасида сўз юритилган.

Ҳужжатга кўра, Органик агрокластернинг асосий вазифалари этиб қуйидагилар белгиланмоқда:

• қишлоқ хўжалиги маҳсулотларини органик усулда етиштиришни ташкил этиш;
• органик сифатга эга бўлган озиқ-овқат маҳсулотларини ишлаб чиқишда илм-фан ютуқлари ва замонавий технологиялардан кенг фойдаланиш;
• органик маҳсулотлар ишлаб чиқаришни ташкил этиш ва илғор техника ва технологиялардан самарали фойдаланиш йўлида кадрлар тайёрлаш, қайта тайёрлаш ва малакасини ошириш;
• қишлоқ хўжалигининг ресурс тежамкор хорижий техника ва технологияларни келтириш, дала тажрибалари ва лаборатория синовлари ўтказиш ҳамда унинг ижобий натижаларини кенг жорий этишга тавсия этиш.

Шунингдек, қарор билан 2020-2021 ўқув йилидан бошлаб Тошкент давлат аграр университетида «Органик қишлоқ хўжалиги ва органик маҳсулот етиштириш» бўйича бакалавриат таълим йўналишлари ва магистратура мутахассисликлари очилиши мумкин.