АҚШ маъмурияти Яқин Шарқдаги операцияни кучайтириш мақсадида минтақада минглаб ҳарбийларни жойлаштириш имкониятини муҳокама қилмоқда. Бу ҳақда бир неча манбаларга таяниб Reuters хабар берди.

Маълумотларга кўра, бу қадам президент Дональд Трампга урушни кенгайтириш ёки янги босқичга олиб чиқиш бўйича қўшимча вариантлар бериши мумкин.

Агентлик манбаларининг айтишича, Эрон соҳилларига ҳарбий куч жойлаштириш орқали Ҳўрмуз бўғозида нефть танкерлари ҳаракатини назорат қилиш ёки Эрон нефть экспортининг 90 фоиз амалга ошириладиган Харг оролига операция ё бўлмаса, бойитилган уран захираларини назоратга олиш асосий вариантлар сифатида кўрилмоқда.

Мутахассисларнинг таъкидлашича, айниқса Харг оролига ёки Эрон ҳудудига қуруқлик қўшинларини киритиш жуда катта хавф билан боғлиқ. Эрон бу ҳудудларга ракета ва дронлар орқали зарба бериш имкониятига эга.

«Ҳозирча қуруқлик қўшинларини жўнатиш бўйича қарор қабул қилингани йўқ. Аммо президент барча вариантларни очиқ сақламоқда», – деган Оқ уй расмийси.

Бу масала жамоатчиликнинг урушни қўллаб-қувватламаётгани ва Трампнинг аввал ташқи урушларга аралашмаслик ваъдаси сабаб мамлакат ичида ҳам баҳсли бўлиб қолмоқда.