Бухоро вилоятининг Қоракўл туманида содир бўлган навбатдаги оилавий фожиа ёш аёлнинг умрига зомин бўлди. Суд ҳужжатларида келтирилишича, 2025 йил 6 ноябр куни тун яримига яқин содир бўлган воқеа оқибатида 22 ёшли талаба Х.И. турмуш ўртоғи қўлидан ҳалок бўлган.

Тергов материалларига кўра, О.Ч. ва Х.И. 2023 йил март ойида турмуш қурган бўлиб, уларнинг бир фарзанди бор эди. Турмуш давомида эр-хотин ўртасида мунтазам келишмовчиликлар кузатилган. 2025 йил сентябр ойида навбатдаги жанжалдан кейин Х.И. ота-онасининг уйига кетиб қолган.

Орадан вақт ўтиб, О.Ч. турмуш ўртоғи фойдаланган телефон рақамини қайта тиклаган ва ижтимоий тармоқлардаги ёзишмалари билан танишган. Унинг айтишича, турмуш ўртоғи бошқа бир эркак билан мулоқот қилганидан хабар топган. Бу ҳолат эр-хотин ўртасидаги муносабатларни янада кескинлаштирган.

О.Ч. турмуш ўртоғи билан телефон орқали боғланиб, учрашишни таклиф қилган, Х.И. таклифга розилик билдириб, Бухоро шаҳридан Қоракўл туманидаги уйига келган.

Судда ўқилган кўрсатмаларга кўра, О.Ч. турмуш ўртоғи келишидан аввал ошхонадан ёғоч дастали пичоқни олиб чиқиб, ётоқхона кириш қисмидаги жавон устига қўйиб қўйган.

Жиноят ишлари бўйича Қоракўл туман суди раиси Бобораҳим Очиловнинг «Xabar.uz»га маълум қилишича, бу ҳолат кейинчалик суд томонидан жиноятнинг олдиндан ўйланганлигини тасдиқловчи муҳим ҳолатлардан бири сифатида баҳоланган.

Кечки суҳбат давомида эр-хотин ўртасида аввалги низолар ва телефондаги ёзишмалар ҳақида гап кетади. Судланувчининг кўрсатувига кўра, Х.И. бошқа шахс билан муносабатда бўлганлигини тан олган. Соат тахминан 23:00 ларда О.Ч. аёлига уни кечирганлигини айтган. Бироқ орадан бир неча лаҳза ўтгач, ётоқхона эшиги олдида турган пичоқни қўлига олиб, аёлига ҳужум қилган.

Экспертиза маълумотларига кўра, жабрланувчи кўкрак, қорин ва қўл соҳаларига жами тўрт марта пичоқ зарбаси олган. Юрак соҳасига етказилган санчиб-кесувчи жароҳатлар оқибатида ўткир ташқи қон кетиши юз берган ва бу унинг ўлимига сабаб бўлган.

Қотилликдан кейин О.Ч. танишига қўнғироқ қилиб, уйда бўлган бувисини бошқа жойга олиб кетишни сўраган. Орадан бир неча дақиқа ўтгач, маҳалла профилактика инспекторига телефон қилиб, турмуш ўртоғини ўлдириб қўйганини маълум қилган.

Ҳодиса жойига биринчи бўлиб етиб келган профилактика инспектори ётоқхонада кроват устида ҳаракатсиз ётган Х.И.ни ва унинг ёнида қон излари бўлган ошхона пичоғини кўрган. Текширув чоғида аёлда ҳаёт аломатлари йўқлиги аниқланган.

Суд жараёнида судланувчи айбига тўлиқ иқрор бўлган. Жабрланувчининг онаси У.А. эса қизининг ўқишни давом эттираётгани, оилавий келишмовчиликларга қарамай, турмушини сақлаб қолишга ҳаракат қилганини таъкидлаб, суддан қонуний жазо тайинлашни сўраган.

Суд ҳайъати иш бўйича йиғилган далиллар, гувоҳлар кўрсатмалари, суд-тиббий, биологик, криминалистик ва психиатрия экспертизалари хулосаларини ўрганиб чиқиб, О.Ч.нинг айби тўлиқ исботланган, деб топилди.

У Ўзбекистон Республикаси Жиноят кодексининг 97-моддаси 1-қисми (қасддан одам ўлдириш) жиноятини содир этганликда айбланган.

Суд ҳукми билан О.Ч. 12 йил муддатга озодликдан маҳрум қилинди. Жазони умумий тартибли колонияда ўташи белгиланди.