АҚШнинг Виржиния штатида жойлашган Фэрфакс округи кутубхонасида кутилмаган, аммо жуда илиқ воқеа қайд этилди. Болалар учун мўлжалланган, 1956 йилда чоп этилган “Harry the Dirty Dog” китобчаси қарийб 35 йилдан сўнг яна ўз жойига — кутубхона жавонига қайтди.

Китоб 1989 йил ноябрида АҚШда яшаётган грек дипломати ва унинг рафиқаси томонидан олинган. Орадан вақт ўтиб, улар бошқа давлатга кўчиб кетишар экан, китоб ҳам “чемоданга тушиб қолган”. Шу тариқа болалар китобчаси дипломатик сафарларни бошлаб, эгалари билан бирга дунёни айланиб чиқди.

Йиллар ўтиб, ота-онаси нафақада, Грецияда яшай бошлаган пайтда, уларнинг ўғли Димитрис уйдаги  жавонда ўзларига тегишли бўлмаган китобни кўриб қолади. Ичида кутубхона муҳри бор китоб унга тинчлик бермайди. Натижада у китобни Фэрфакс кутубхонасига почта орқали юбориб, илова хатда унинг “узоқ ва серсаёҳат тақдири”ни тушунтириб беради.

Кутубхона ходимлари китобнинг қайтиб келганидан чин дилдан хурсанд бўлишди. Улар нафақат Димитрисга, балки китобни йиллар давомида эҳтиёткорлик билан сақлаб келган ота-онасига ҳам миннатдорчилик билдиришди. Чунки кеч қайтган бўлса-да, китоб жуда яхши ҳолатда эди.