Япониянинг Кумамото префектурасида истиқомат қилган, мамлакатдаги энг кекса эркак киши деб тан олинган Ҳикару Като 111 ёшида оламдан ўтди.

1914 йил 2 майда таваллуд топган Като Иккинчи жаҳон уруши даврида Тайван ва Филиппиндаги қонли жангларда иштирок этган ва яраланган. Кейинчалик Индонезиянинг Тимор оролига юборилган Като ўша ерда Япониянинг мағлубияти ҳақида хабар топган. Австралия ҳарбийлари томонидан асирга олинган, тутқунликда деҳқончилик қилиб жон сақлаган ва 1946 йилнинг баҳорида ватанига қайтган.

Урушдан сўнг у қишлоқ, ўрмон ва балиқ хўжалиги вазирлигида фаолият юритиб, мамлакат иқтисодиётини тиклашга ҳисса қўшган. 1973 йилда нафақага чиққач, шаҳар устахонасида кексаларга кулолчилик сирларини ўргата бошлаган. Кулолчилик билан ҳатто 90 ёшдан ошганида ҳам мунтазам шуғулланиб келган.

Умрининг сўнгги йилларида ҳам ижтимоий фаоллигини йўқотмаган отахон 109 ёшига қадар маҳаллий газеталарда ўз хотиралари билан бўлишиб, уруш даҳшатларини баён қилган ва тинчликни асраш нақадар муҳимлигини таъкидлаб келган.