Ўзбекистон Республикаси президенти Шавкат Мирзиёев раислигида 2 август куни кичик бизнес ва тадбиркорликни ривожлантириш бўйича амалга оширилаётган ишлар таҳлилига бағишланган видеоселектор йиғилиши ўтказилгани ҳақида хабар берилган эди.

Видеоселекторда президент сўнгги кунларда Хоразм, Қашқадарё ва Фарғона вилоятларида «снос» билан боғлиқ ишларни қаттиқ танқид қилди.

Ушбу вилоятлар ҳокимлари ўзларининг зўравонлик ишлари билан президент сиёсатига катта душманлик қилаётганини таъкидлади.

«Хоразм вилояти ҳокими жаноб Эрманов менинг сиёсатимга энг катта душманлик қилганлардан бири. Урганч шаҳар ҳокимини жиноий жавобгарликка тортамиз, десам, адвокат бўлиб, бош вазиримизга илтимос қилдинг. Мана, сенинг менга қилган «дўстлигинг». Сен ва менинг сиёсатим тўғрисидаги бугун чиққан изоҳларни ўқи.

Сен ноинсоф менга дўст бўлсанг, бузиш қўлингдан келмас экан, нима қиласан у ерни бузиб? Мана, изоҳларни ўқи. Бош вазир борганидан сўнг одамлар нима деб ёзаяпти? Сенинг суратинг йўқ бу ерда. Бош вазирники турибди ва президентнинг сиёсатига лаънат айтишяпти.

Атрофингда ўтирган одамларинг билан мана менга қилган душманликларинг. Бузишдан олдин калланг билан ўйлаб кўрмайсанми, бузгандан фойда борми ёки йўқ? У ноинсофларга шунча пул бердик 30-50 миллиардлаб, нима қиласан у пулни? Катта холангнинг пулими у молия вазирлигининг пули? Ё Ўзбекистонга ўтказиб қўйган жойинг борми?

Бировни ишдан олиш, жиноий жавобгарликка тортиш керак бўлса дарров адвокатга айланасизлар.

Буларни ўқиб мен қандай кабинетимда тинч ўтира олай?» — дейди президент.

«Иккинчиси, Қашқадарёнинг валломати бор, Рўзиев деган, 5 йил қишлоқ хўжалиги вазири бўлиб ишлаган ноинсоф. ДХХ раҳбари борганидан сўнг чиққан изоҳларни ўқи. Битта жиннинг менинг сиёсатимни бутун дунёга шарманда қилди. Ўзимни туманим, у қиламан, бу қиламан, дейсан. Битта тузукроқ кадринг йўқ, яна Деҳқонободга тирмашасан. Ўзбекистондаги ҳозирги ошкоралик, шаффофликни таъминлаш учун кечаю-кундуз юритаётган сиёсатимга атрофингдагилар билан қилган «дўстлигинг».

Қўлингдан келмас экан, нима қиласан бир одамнинг туппа-тузук турган уйини бузиб? Сен хулоса қил, уйингни биров келиб бузса?

Ноинсофлар, мен сизларнинг қай бирингга бузгин, деб топшириқ бердим? Мен сизларга аввало одамларни рози қилиб, кейин жаноб Зокиров деган вазир билан ўтириб, лойиҳа қилиб, бош вазирга ҳисобот бериб, кейин қилинглар, деб топшириқ берганман.

Мана, сенинг «дўстлигинг», жаноб Рўзиев! Ўзингни ўша туманга ҳоким қилиб юбораман, айтиб қўяй!» — дейди президент.

«Мана, интернет фойдаланувчиларининг Риштондаги кўчмас мулк бузилишларига нисбатан изоҳлари. Мен сизларга тайёр пул бераяпман, пулни «Обод қишлоқ» қилинглар, деб бераяпман. Мана, сенинг менга «дўстлигинг», Ғаниев деган валломат!

Мана, одамлар изоҳларда йиғлаяпти, сенинг расминг йўқ, президентнинг расми бор. Сен ноинсоф бориб, Эрмановга ўхшаб аҳмоқларча «буза, буз» дейсан. Бузишдан аввал сен ўз бошингни буз. Мен сени шунинг учун тарбия қилиб юрувдимми? Қош қўяман деб кўз чиқариб…

Болалар меҳнати бор эди, энди у йўқ бўлди, энди бутун интернет президент топшириқ берган, бузиш, одамларни норизо қилиш билан тўлиб тошди.

Эй ноинсоф, Риштон бўйича ҳам сенга пул бериб айтдимки, Риштонни янгилаш керак, бироқ одамларни рози қилиб қилиш керак, деб. Жаноб Ғаниев, тажрибали ҳоким! Майли, Эрманов кеча келган ҳоким, Рўзиев иккаланг хиёнатчисан! Сизлар билан катта-катта ишларни амалга ошира оламизми? Ҳеч қачон ошира олмаймиз! Чунки сизларга бир топшириқ беришга одам қўрқади! Нега десангиз, савиянг йўқ, билиминг йўқ, китоб ҳам ўқимайсан, президентнинг қарорини ҳам», — давом этади президент.

«Шуларнинг ҳаммасини инобатга олиб, бош вазир тўртта секторнинг ишини ўрганиб, уларнинг масъулияти ва жавобгарлиги бўйича менга қарор таклиф қилади. Тўртта сектор ишламаяпти.

Иккинчидан, масъулият ва жавобгарликни ҳис қилиш йўқ.

Учинчидан, мен биринчи кунидан такрорлаб келмоқдаман: одамларни бугун рози қилайдик, деб. Сизлар рози қилиш уёқда турсин, қилган ишинг одамларда норозилик уйғотиш бўлмоқда.

Сизларга ўхшаган ноинсофлар билан ишлаганим учун Ўзбекистонни бутун дунёга шарманда қилаяпсизлар. Эрманов, Ғаниев, Рўзиев ва шунга ўхшаган одамлар.

Агар миқдорини олсак, икки ярим йилда тадбиркорлик учун ажратган пулимиз 30 йилда берилмаган. Бунинг натижаси иқтисодиётда, одамларнинг кайфиятида, ялпи ишлаб чиқаришда акс этиши керак. Ажратган кредитларимизнинг 60 фоизи ҳали иқтисодиётда ўзининг ижобий таъсирини кўрсата олгани йўқ, жаноб Қўчқоров. Бу қип-қизил сенинг айбинг!

Бу масалалар ҳали тинчигани йўқ. Шунинг учун Арипов ва Низомиддиновга топшириқ: қайси вилоят ҳокимини ишдан олиш бўйича таклиф берасизлар.

Мен яна бир марта такрорлайман: бундай зўравонлик сиёсати билан биз узоққа бора олмаймиз. Агар зўравонлик сиёсати фойдали бўлганида 30 йилда зўр бўлиб кетган бўлар эдик.

Эрмановнинг қилган қилиғи, Рўзиевнинг қилган хиёнати — бу маданиятсизлик.

Энди учови интернет орқали мурожаат қилсин, Абдулла Негматович! Рўзиев ҳам, Эрманов ҳам, Ғаниев ҳам — ҳаммаси. Қандай қилиб мурожаат қилишини сиз ўзингиз айтинг.

Бутун элга айтсин: Ўзбекистонни ундай деб ўйламанглар, мен аҳмоқлик қилганман, мен хиёнат қилганман, деб. Миллат эмас, мамлакат эмас, давлат эмас, деб. Керак бўлса ўша блогерларни йиғсин, блогерларга ўзлари ҳисобот беришсин», — деган Шавкат Мирзиёев видеоселекторда.