Россияга қарши 2014 йилдан буён жорий этилган санкциялар сони 31,5 мингтадан ошди. Бу ҳақда РИА Новости очиқ маълумотлар ва Castellum мустақил таҳлилий портали ахборотига асосланиб хабар берди.

Бу ерда гап савдога оид бўлмаган чекловлар ҳақида кетмоқда (муайян товарлар савдосига қўйилган санкциялар бундан мустасно). Чекловларнинг қарийб 92,5 фоизи 2022 йил феврал ойи охиридан бошлаб кучга кирган.

Россияга қарши энг кўп чекловларни АҚШ киритган — 23,5 фоиз ёки 7 411 та. Уларнинг сони бироз камайган, чунки Қўшма Штатлар 2025 йил 18 декабр куни еттита юридик ва икки нафар жисмоний шахсни Россияга қарши санкциялар рўйхатидан чиқарган эди. Чеклов киритган мамлакатлар етакчи учлигидан Канада (12,6 фоиз, 3 980 та) ва Швейцария (12,2 фоиз, 3 851 та) жой олди.

Тўртинчи ўринни Европа Иттифоқи банд этди: 19-санкциялар пакетини ҳам қўшганда, ЕИ Россияга қарши 3 212 та чеклов (10,2 фоиз) жорий этган. Кейинги ўринларда: Норвегия — 2 838 та (9 фоиз), янги чекловлар ҳисобига олтинчи ўринга кўтарилган Буюк Британия — 2 537 та (8,1 фоиз), Исландия — 2 482 та (7,9 фоиз) ва Янги Зеландия 2 032 та (6,4 фоиз) санкция.

Ўнликка, шунингдек, Австралия — 1 694 та (5,4 фоиз) ва Япония — 1 441 та (4,6 фоиз) ҳам кирди.