Donald Tramp mamlakatning yangi «Birinchi bort»i – Air Force One’ni jamoatchilikka tanishtirdi.

Qatar tomonidan taqdim etilgan Boeing 747-8 samolyoti AQSh Mudofaa vazirligi buyurtmasi asosida to‘liq modernizatsiya qilingan. Tramp uni «dunyodagi eng hashamatli samolyot» deb atadi.

«Siz uni ko‘rsangiz, ishonmaysiz. Yog‘och bezaklar sifati, materiallar va dvigatellar darajasi hayratlanarli», – dedi AQSh rahbari Vashington yaqinidagi Endryus harbiy bazasidagi taqdimot marosimida.

Oq uy rahbarining ta’kidlashicha, yangi samolyot avvalgi prezident laynerlariga nisbatan uzoqroq masofaga va yuqori tezlikda ucha oladi.

AQSh Harbiy-havo kuchlari ma’lumotiga ko‘ra, samolyot xavfsizlik, aloqa va logistika tizimlari bo‘yicha yangilangan. Intererning hozirgi ko‘rinishi e’lon qilinmagan bo‘lsa-da, uning avvalgi hashamatli uslubi saqlab qolingani aytilmoqda.

OAV va aviatsiya mutaxassislari baholashicha, Boeing 747-8 samolyoti Qatar tomonidan topshirilgan paytda taxminan 400 million dollarga baholangan. Modernizatsiya ishlaridan keyin uning umumiy qiymati 1 milliard dollarga yaqinlashgan bo‘lishi mumkin.

Trampning ma’lum qilishicha, yangi Air Force One 4-iyul kuni AQSh mustaqilligining 250 yilligi munosabati bilan o‘tkaziladigan aviashouda ishtirok etishi mumkin. Prezident samolyotdan ilk rasmiy parvozni iyul oyi boshida NATO sammitiga yo‘l olishda amalga oshirishni rejalashtirmoqda.