AQSh tomonidan Eron neftiga nisbatan sanksiyalarni vaqtincha yumshatilishi ortidan Osiyodagi bir qator davlatlar, xususan Hindiston, Eron neftini qaytadan sotib olish imkoniyatini ko‘rib chiqmoqda.

Ma’lumotlarga ko‘ra, Vashington neft bozorida yuzaga kelgan tanqislikni yumshatish maqsadida 30 kunlik sanksiya istisnosini joriy etgan.

Ma’lum qilinishicha, bu qaror faqat hozirda dengizda ushlanib qolgan Eron neftini 19 aprelgacha sotib olishga amal qiladi. Ya’ni, bu qaror yangi eksportni emas, balki mavjud neft zaxiralarini bozorga chiqarishni nazarda tutadi.

Hindiston neftni qayta ishlash zavodlari Eron neftini xarid qilishga tayyorgarlik ko‘rmoqda. Ular hukumat ko‘rsatmalari va to‘lov mexanizmlari bo‘yicha aniqlik kutmoqda va boshqa Osiyo davlatlari ham xarid imkoniyatlarini o‘rganmoqda.

Osiyo mamlakatlari neftning katta qismini Yaqin Sharqdan oladi, shu sababli Ho‘rmuz bo‘g‘ozi atrofidagi vaziyat ularga jiddiy ta’sir ko‘rsatmoqda.

Mutaxassislarga ko‘ra, taxminan 130–170 mln barrel Eron nefti hozirda dengizda saqlanmoqda va bu hozirgi ishlab chiqarish yo‘qotishlarini qisman qoplashga yordam beradi.