Вашингтон Теҳронга Яқин Шарқдаги урушни тўхтатиш бўйича 15 пунктдан иборат режа тақдим этган. New York Times нашрининг таъкидлашича, бу қадам Трамп маъмурияти зиддиятдан чиқиш йўлини излаётганини кўрсатади.

Режа бир неча асосий масалаларни, жумладан, Эроннинг ядровий ва ракетавий дастури, Ҳўрмуз бўғозида хавфсизликни тиклаш ҳамда энергия таъминотидаги узилишларни бартараф этишни қамраб олади.

Айниқса, Ҳўрмуз масаласи муҳим ҳисобланмоқда. Чунки унинг блокланиши нефть ва газ бозорида кескин сакрашларга олиб келган.

Нашр, режа Теҳронга тўғридан-тўғри эмас, балки Покистон орқали етказилганига ва у икки давлат ўртасида дипломатик воситачи сифатида қатнашганига эътибор қаратган.

Шу билан бирга, Дональд Трамп аввалроқ музокараларни «самарали» деб баҳолаб, Эрон энергетика объектларига зарбаларни 5 кунга кечиктирганини айтганди.

Бироқ Эрон бу маълумотларни рад этмоқда. Парламент спикерига кўра, ҳеч қандай музокара бўлмаган ва бу каби хабарлар бозорларга таъсир қилиш учун тарқатилмоқда.