Чилида ҳисобчининг хатоси ходимни «миллионер»га айлантирди — у белгиланганидан 330 баравар кўп ёки 27 йиллик маошини биттада олди. Daily Mirror нашрининг ёзишича, унинг ҳисобига 500 минг песо ўрнига 165 миллион песо (тахминан 180 минг доллар) келиб тушган.

Воқеа 2022 йилда Сантягода юз берган. Consorcio Industrial de Alimentos (CIAL) компанияси ходими дастлаб катта миқдордаги маблағ тушгани ҳақида раҳбариятга хабар бериб, пулларни қайтаришни ваъда қилган.

Бироқ бир неча кундан сўнг у ишга келишни тўхтатиб, қўнғироқларга жавоб бермай қўйган. Кейинроқ эса адвокати орқали ўз хоҳиши билан ишдан бўшаганини маълум қилди.

Компания зудлик билан полицияга мурожаат қилиб, ходимни ўғирликда айблади. Адвокатлар эса маблағ тўлов тизимига ҳеч қандай таъсир ўтказилмаган ҳолда, фақатгина компаниянинг хатоси билан келиб тушганини таъкидлашди.

2025 йил сентябрида бўлиб ўтган суд ходимнинг фойдасига ҳукм чиқарди. Суд хулосасига кўра, ҳолат ўғирлик эмас, балки «рухсатсиз ўзлаштириш» сифатида таснифланди ва бунинг учун Чили қонунчилигида жиноий жазо кўзда тутилмаган.

Шунга қарамай, CIAL компанияси пулни қайтариб олиш учун фуқаролик даъвосини қўзғатиш ва суд қарорини бекор қилишга уриниб кўришини билдирди.