Россия президенти Владимир Путин православ Пасха байрами муносабати билан 11 апрель соат 16:00 дан 12 апрель охиригача ўт очишни тўхтатишни эълон қилди.

Кремл баёнотида Россия Украина ҳам бу ташаббусга қўшилишини кутаётгани таъкидланган.

Бироқ Киев бу қарордан аввал Москва бир неча бор Пасха байрами учун сулҳ чақириқларини эътиборсиз қолдирганини билдирди. Украина президенти Владимир Зеленский сўнгги ҳафталарда бир неча бор ўт очишни тўхтатишни таклиф қилган.

Зеленский Россия баёнотига жавобан Украина «Москва каби» жавоб беришга тайёр эканини айтди. Унинг таъкидлашича, «одамлар Пасхани хавфсиз нишонлашлари керак ва бу тинчликка реал қадам бўлиши лозим».

Айни пайтда Россия-Украина урушида дипломатик жараёнлар секинлашгани қайд этилмоқда. ОАВ маълумотларига кўра, Кремл вакили Кирилл Дмитриев АҚШга ташриф буюриб, музокаралар ўтказмоқда.

Хабарларга кўра, муҳокамалар Украинадаги урушни тўхтатиш ва Россия–АҚШ иқтисодий ҳамкорлигини ҳам қамраб олади.

Шу билан бирга, санкциялар масаласи ҳам долзарб бўлиб қолмоқда. Зеленский АҚШни Россия нефтига қарши чекловларни қайта жорий этишга чақирди.

Унинг фикрича, санкциялар бекор қилиниши Москвага миллиардлаб доллар даромад келтирган.