Франция президенти Эммануэль Макрон Европа Иттифоқи ва АҚШ ўртасида, жумладан Гренландия масаласи сабаб юзага келган кескинлик пасайди, деб ҳисоблаш нотўғри эканини билдирди. У европалик етакчиларни узоқ вақтдан бери кечиктириб келинаётган иқтисодий ислоҳотларни амалга оширишга ва Европа Иттифоқининг глобал таъсирини кучайтиришга чақирди.

У бу ҳақда Макрон Financial Times, The Economist ва бошқа Европа нашрларига берган интервьюсида айтди.

«Очиқдан-очиқ тажовуз содир бўлаётган бўлса, биз ён беришимиз ёки келишувга эришишга уринишимиз керак эмас. Биз бу стратегияни бир неча ой давомида синаб кўрдик – у иш бермади», – деди Макрон.

Шу билан бирга, у АҚШ президенти Дональд Трамп билан муносабатларда «ҳамиша ҳурматли ва олдиндан тахмин қилса бўладиган» позицияда эканини, бироқ «заиф эмас»лигини таъкидлади.

Макроннинг фикрича, Европа ҳозир Европа Иттифоқига нисбатан «очиқча антиевропача» муносабатда бўлаётган, уни «менсимайдиган» ва «унинг бўлинишини истаётган» АҚШ маъмурияти билан иш олиб бормоқда.

«Савдо майдонида биз Хитой томонидан келаётган кучли босимга дуч келяпмиз, АҚШ томонидан эса доимий беқарорлик кузатилмоқда. Бу икки инқироз европаликлар учун жиддий силжиш, бурилиш нуқтасидир. Инқирознинг энг юқори нуқтасидан кейин маълум енгиллик сезилса ҳам, ҳамма нарса батамом якунланди, деб ҳушёрликни йўқотмаслик керак. Чунки ҳозир доимий беқарорлик мавжуд», – деди Франция президенти.

Дональд Трамп бир неча бор Данияга қарашли автоном ҳудуд – Гренландия АҚШ таркибига кириши кераклигини билдирган. У бунга эришиш учун турли вариантлар, жумладан ҳарбий куч ишлатиш ёки оролни сотиб олиш имкониятини ҳам муҳокама қилган. Шунингдек, Трамп Гренландия АҚШга берилмагунча саккизта Европа давлатига нисбатан бож жорий этилишини маълум қилган.

Кейинроқ Трамп НАТО бош котиби Марк Рютте билан учрашувдан сўнг Гренландия ва умуман Арктика минтақаси бўйича келажакдаги келишув учун асос яратилганини билдирган. ОАВ маълумотларига кўра, мазкур келишув Даниянинг Гренландия устидан суверенитети сақланиб қолишини назарда тутади.