Доналд Трамп Гренландияни эгаллаш ниятида, НАТО эса жим — сукунат Европа Иттифоқи давлатларини хавотирга солмоқда, деб ёзди ўз манбаларига асосланган Financial Times.

НАТО Дания ҳуқуқларини ҳимоя қила олмаслиги эҳтимолидан Европа етакчилари қаттиқ ташвишда. Бу ўз иттифоқчиларни билган кўйга солиш ниятидаги Трампнинг тегирмонига сув қуйиш билан баробар.

Германия ташқи ишлар вазири Йоҳанн Вадефул 11 январ куни Bild нашрига интервюсида АҚШ президентининг Гренландияга ҳудудий даъволарини қоралади. Оролнинг ҳудудий суверентитети масаласини фақат Гренландия ва Дания ҳал қилади, деди у.

Доналд Трамп 4 январдаги баёнотида Гренландия устидан назорат ўз мамлакати учун «ўта зарур»лиги таъкидлади. Данияга қарашли орол тевараги Россия ва Хитой кемаларига тўлиб кетган, АҚШ ўз мудофаа хавфсизлиги учун оролни эгаллаши керак, деган у.

Аммо кўпгина разведка маълумотларини дастак қилган европалик сиёсатчилар Гренландия яқинида рус ва хитой кемалари деярли йўқлиги, борлари ҳам Арктиканинг Норвегияга яқин қисмида кузатилганини таъкидлашмоқда.