Словакия ва Венгрия раҳбарлари Россия нефтининг «Дружба» қувури орқали транзити тўхтатилгани ортидан Украинага электр энергияси етказиб беришни чеклаш ёки тўхтатиш масаласини кўриб чиқишларини маълум қилди.

Словакия бош вазири Роберт Фицо Украина президенти Зеленскийдан нефть транзитини 23 февраль, душанба кунига қадар тиклашни талаб қилди. Акс ҳолда, Братислава жавоб чораларини кўришга тайёрлигини билдирди.

Фицо ўз баёнотида Ғарбни танқид қилиб, агар «Шимолий оқим» газ қувури портлатилишига нисбатан кескин муносабат билдирилмаган бўлса, Словакия Украина билан муносабатларда бир томонлама ёндашувни қабул қила олмаслигини айтди. У Словакияни «ғурурли ва суверен давлат» деб атади.

Венгрия бош вазири Виктор Орбан ҳам Киевга нисбатан қатъий чоралар эҳтимолини истисно этмади. Унинг айтишича, агар нефть транзити қайта тикланмаса, Будапешт Украинага электр энергияси экспортини тўхтатиши мумкин.

Орбан Венгрия бир неча ойга етадиган нефть захирасига эга эканини таъкидлар экан, ҳукумат учта қарши чора кўриши мумкинлигини билдирди. Унга кўра, улардан иккитаси аллақачон амалга оширилган, учинчи чора эса электр энергияси етказиб беришни тўхтатиш бўлиши мумкин.

20 февраль куни Украина Европа Иттифоқига «Дружба» ўрнига Одесса — Броды нефть қувуридан вақтинча фойдаланишни таклиф қилди. Бу орқали Венгрия ва Словакияга ёқилғи етказиб бериш режалаштирилган.

Россиянинг тўлиқ миқёсдаги босқини бошланганидан буён Украина энергетика тизими мунтазам равишда оммавий ҳужумларга учраб келмоқда. Иссиқлик электр станциялари, подстанциялар ва генерация объектларига зарбалар берилиши натижасида мамлакат бир неча қиш мавсуми давомида кенг кўламли электр узилишларига дуч келди.

2022–2023 йиллар куз ва қиш ойларида Украина мустақиллик йилларидаги энг йирик энергетик инқирозни бошдан кечирди. Миллионлаб аҳоли бир вақтнинг ўзида электр, иссиқлик ва сув таъминотисиз қолди. Қатор ҳудудларда фавқулодда ва барқарорлаштирувчи ўчириш жадваллари жорий этилди.

2024 ва 2025 йилларда ҳам инфратузилмага янги зарбалар ортидан вазият такрорланди. Йирик генерация объектларининг шикастланиши қувват танқислигини келтириб чиқарди, айниқса пик соатларда. Айрим ҳудадларда авариявий ўчиришлар жорий этилди, саноат корхоналари учун эса истеъмол чекловлари қўлланилди.