Кеча 10 ноябрь куни Украина мудофаа вазири Алексей Резников Россия ўз қўшинларини Херсондан олиб чиқиш учун камида бир ҳафта вақт кетишини айтди.

Вазир Алексей Резников Reyter агентлигига берган интервьюсида Херсон вилоятидаги Россия ҳарбий гуруҳи ҳозирда 40 мингга яқин кишини ташкил этишини таъкидлаган. Ҳозирда Россия армияси Херсон шаҳрининг атрофида ва Днепр дарёсининг ўнг қирғоғида жойлашган.

«Бу қўшинларни Херсондан бир-икки кун ичида олиб чиқиб кетиш унчалик осон эмас. Ҳеч бўлмаганда бир ҳафта керак бўлади», дейди Украина мудофаа вазири.

Резниковнинг таъкидлашича, бундай олиб чиқиш орқали ҳар икки томон кучларини бошқа ҳудудларда жанг қилиш учун йўналтиради. Унинг айтишича, Россия ўз кучларини сўнгги бир неча ой ичида қисман босиб олинган қўшни Запороже вилоятида ҳам кучайтириши мумкин.

Вазир Алексей Резников қўшимча қилишича, қиш фасли жангларни секинлаштириб, ҳар икки томонни қайта йиғиш имкониятини беради.

«Қиш ҳар икки томоннинг жанг майдонидаги ҳар қандай фаоллигини секинлаштиради. Бу ҳамма учун фойдали. Нафас олишингиз мумкин», – дейди у.