Бир неча кун аввал АҚШ президенти Дональд Трампнинг тиббий кўриги ва когнитив тести натижалари эълон қилиниб, унинг саломатлиги аъло даражада экани айтилган эди. Аммо амалиётчи шифокорлар ҳисобот юзасидан эътирозли саволларни бермоқда.

Оқ уй томонидан 29 май куни эълон қилинган тиббий ҳужжатга кўра, Трамп Мэриленд штатидаги Уолтер Рид номидаги Миллий ҳарбий-тиббий марказда кўрикдан ўтган.

Доктор Шон Барбарелла президент Трампнинг «саломатлиги аъло даражада экани, юрак, ўпка, асаб тизими фаолияти юқори кўрсаткичга эгалиги ҳамда умумий жисмоний ҳолати cоз экани» ни таъкидлаган.

Трамп когнитив функцияларни баҳолаш бўйича 30 баллик Монреал тизимида 30 балл тўплаган. Шунга кўра, шифокор Трамп «олий бош қўмондон ва давлат раҳбари сифатида барча вазифаларини бажаришга тўлиқ қодир» деб хулоса берган.

Аммо АҚШ матбуоти, жумладан, Axios нашри хабар беришича, кўплаб амалиётчи шифокорлар тиббий хулосани «фильтрланган» дея танқид қилган.

Хусусан, кардиолог ва томир жарроҳлари доктор Шон Барбарелланинг президент юрагининг ҳолати борасидаги некбин хулосасини тасдиқловчи муҳим маълумотлар йўқлигини қайд этган. Масалан, ҳужжатда кальций индекси (юрак ишемик касаллиги хавф гуруҳларини белгиловчи кучли восита) ҳақидаги маълумотлар, қон томирлари компьютер томографияси натижаларининг умумқабул қилинган CAD-RADS шкаласи бўйича кўрсаткичлари келтирилмаган. Бунинг ўрнига ҳужжатда артериал тиқилишлар йўқлиги ҳақида ўта умумий тарзда сўз юритилган.

Оқ уйнинг аввалги тиббий ҳисоботида Трампда веноз етишмовчилиги ташхиси қайд этилгани маълум. Янги ҳисоботда сурункали веноз етишмовчилиги ҳолатининг яхшилангани ҳақида сўз юритилгани ҳолда, бундай ижобий натижага қандай эришилгани очиқланмаган. Шифокорларга кўра, ушбу касалликнинг ўз-ўзидан яхшиланиб кетиши ўта камёб ҳодиса ҳисобланади.

Бундан ташқари, шифокорлар қондаги холестерин кўрсаткичларининг деярли идеал даражада экани ҳам ўта нодир ҳолат эканига эътибор қаратган.

Forbes нашри ёзишича, Трамп аспиринни юрак-қон томир касалликлари ва инсульт профилактикаси учун одатда тавсия этиладиган кичик дозадан фарқли равишда катта дозада ичиши ҳам савол туғдирмоқда.

Экспертлар, шунингдек, президентнинг қўлларида тез-тез кўкаришлар пайдо бўлиши бўйича берилган тушунтириш ишонарли эмаслигини кўрсатиб ўтган. Трампнинг даволовчи шифокори бу шунчаки аспирин қабул қилиш ва тез-тез қўл бериб кўришиш натижаси эканини маълум қилган.

Бошқа шифокорлар фикрича эса, агар оддий қўл бериб кўришиш ҳам кўзга ташланадиган кўкаришларни келтириб чиқарса, бу қон томирлари деворларининг ўта юпқалашганидан ёки тромбоцитлар даражасининг хавфли равишда пасайиб кетганидан далолат беради. Беморнинг ёши ҳисобга олинса, бу ички қон кетишлар ва ҳатто инсульт хавфи юқори эканини англатиши мумкин.

Умр вафо қилса, яна икки ҳафтадан кейин – 14 июнь куни 80 ёшни қаршилайдиган Трамп сўнгги вақтларда давлатлар номлари, жуғрофий атамалар борасида бир неча бор хатоликка йўл қўйди.

«Биз Камбоджа ва Арманистон ўртасидаги зиддиятни тўхтатдик. У эндигина бошланган ва жуда ёмон ихтилоф эди. Буни ўйлаб кўринглар», – деган эди Трамп 2025 йил 20 сентябрь куни Cornerstone институти ташкил этган тадбирдаги чиқишида.

2025 йил июль ойида эса Либерия президенти Жозеф Боакайнинг инглизчада мукаммал гапиришидан ҳайратга тушган Трамп ундан бунчалик чиройли гапиришни қаерда ўрганганини сўраган. Яъни АҚШ етакчиси Либерияда давлат тили инглиз тили эканини ё билмаган, ёки унутган.

Трампнинг бу каби хатолари ортидан ижтимоий тармоқларда унинг ақлий салоҳияти борасида саволлар янграмоқда.

2025 йил август ойида ижтимоий тармоқларда Трамп вафот этгани ҳақида миш-миш тарқалган ва кейинроқ у рад этилган эди. 

Жорий йил бошида эса Европа Иттифоқи сиёсатчилари Трампнинг саломатлиги ҳамда президент сифатида масъулиятни нечоғли ҳис этаётгани масаласини фаол муҳокама қилган, Қўшма Штатлар етакчисининг аҳволи хавотирли деб баҳоланган эди.