Германия канцлери Фридрих Мерц Эрондаги вазият кескин ёмонлашса, Европа томон янги қочқинлар оқими юзага келиши мумкинлигидан хавотир билдирди.

Унинг таъкидлашича, Германия ҳукумати 2015 йилдаги Сурия сценарийси такрорланишини истамайди.

«Биз бу ерда Сурия сценарийси такрорланишини истамаймиз. Биз Эрон давлати ўз фаолиятини сақлаб қолишини хоҳлаймиз», – деди Мерц Мюнхенда ўтган халқаро ҳунармандчилик ярмаркаси якуни бўйича ўтказилган матбуот анжуманида.

Канцлернинг фикрича, бунинг учун мамлакат аҳолисининг асосий эҳтиёжларини таъминлаш муҳим. У Эрон аҳолиси сони 90 миллиондан ортиқ эканини ҳам таъкидлади.

Мерцнинг айтишича, ҳозирча Германия ҳукумати Европа томон келиши мумкин бўлган эронлик қочқинлар сонини аниқ баҳолай олмаяпти. Шу сабабли Берлин Эроннинг суверенитетини сақлаб қолиш масаласига катта аҳамият қаратмоқда.

Канцлер шунингдек АҚШ ва Исроилни вазиятни барқарорлаштириш учун тезроқ музокаралар ўтказишга чақирди.

Эслатиб ўтамиз, 2011 йилда бошланган Суриядаги фуқаролик уруши Европа томон катта миграция тўлқинини келтириб чиқарган эди. 2015 йилда унинг энг юқори нуқтаси кузатилиб, фақат Германиянинг ўзига тахминан бир миллион қочқин келган.

Ўша даврда Германия канцлери Ангела Меркель қонуний асосга эга бўлган барча одамларга бошпана бериш кераклигини билдирган эди. Аммо бу қарор мамлакат ижтимоий тизимига катта босим юклаган.

Қочқинларни жойлаштириш учун айрим ҳолларда бўш турган мактаблар ва фабрикалар ҳам вақтинча бошпанага айлантирилган.

Мутахассислар фикрича, айнан шу миграция инқирози Германияда миграцияни чеклашни талаб қилаётган сиёсий кучлар, жумладан «Германия учун альтернатива» партияси оммалашишига ҳам таъсир кўрсатган.