Германия ташқи ишлар вазири Йоханн Вадефул Ҳўрмуз бўғозидаги транзитни тиклашда НАТОнинг ролини кўрмаётганини билдирди.

Унинг айтишича, НАТО бу йўналишда ҳеч қандай қарор қабул қилмаган ва бўғоз учун масъулиятни ўз зиммасига олиши ҳам кутилмаяпти. Вадефул бу ҳақда Брюсселда ЕИ ташқи ишлар вазирлари учрашуви олдидан айтган. 

Шу билан бирга, у Европа Иттифоқида Ҳўрмуз бўғози бўйича алоҳида қадамлар муҳокама қилинаётгани, аммо ҳозирча аниқ қарор йўқлигини билдирди.

«Германия эса бу масалада ҳарбий эмас, дипломатик ечим тарафдори бўлиб қолмоқда», – деди Вадефул.

Германия ТИВ раҳбари Туркия ҳудудига Эрон дронлари ҳужуми кузатилган ва уларнинг НАТО ҳаво ҳужумидан мудофаа тизимлари томонидан тутиб қолингани воқеалари фонида ҳам Яқин Шарқдаги воқеалар ҳозирча НАТОга бевосита таҳдид эмаслигини айтганди.

Эслатиб ўтамиз, аввалроқ Трамп НАТО давлатларини Ҳўрмуз бўғозини очиқ сақлашга ёрдам беришга чақириб, акс ҳолда альянсни «жуда ёмон келажак» кутаётганини айтганди.